Ekologiya
Bu qış Bakıya qar yağacaq?
Paytaxt sakinlərini son günlər bir sual düşündürür: Niyə bir gün qışın soyuğu, növbəti gün isə yazın günəşi hiss olunur?
Crossmedia.az xəbər verir ki, ekoloq Samir Quliyev Bakıdakı bu anomal "hava oyunları"nın pərdəarxası səbəblərini və insan həyatına gözlənilməz təsirlərini açıqlayıb.
Ekoloqun sözlərinə görə, bu kəskin dalğalanmalar birbaşa atmosferdəki rəqabətlə bağlıdır. Şimaldan gələn qütb soyuqları ilə cənubun isti hava axınları Bakı üzərində qarşı-qarşıya gələrək havanı saatlar içində dəyişir. Samir Quliyev məsələyə belə aydınlıq gətirib:
“Şimaldan soyuq hava axınları temperaturu düşür, cənubdan isti hava gətirən axınlar isə havanı mülayimləşdirir. Bu dəyişkənlik son illərdə qlobal iqlim dəyişikliyi ilə daha nəzərəçarpan olub. Havanın sürətlə dəyişməsi bitkilərin çiçəkləmə dövrünü poza bilər. Bu, kənd təsərrüfatında məhsuldarlığın azalmasına səbəb ola bilər. İnsan sağlamlığı üçün də risk yaradır, xüsusilə soyuqdəymə və allergiya halları artır”.
Ekspert qeyd edir ki, bu proses təkcə təbiətə deyil, həm də dövlətin və fərdlərin büdcəsinə təsir edir. İstilik sistemlərinin qeyri-sabit iş rejimi və proqnozların çətinləşməsi yeni çağırışlar yaradır. O, əlavə edib ki:
“Dalğalanmalar hava şəraitini proqnozlaşdırmağı çətinləşdirir. Qısa müddətli soyuq hava isə nadir hallarda güclü qış fəsadlarına gətirib çıxarır. Bakı iqlimi mülayim olduğundan uzunmüddətli sərt qışlar gözlənilmir. Lakin ani soyuq dalğalar bitkiləri və insanları təsir edə bilər. Bu səbəbdən hava dəyişikliklərinə hazırlıq və diqqət vacibdir”.
İqlim dəyişikliyinin bu qədər dinamik xarakter alması yalnız Bakı üçün deyil, bütün region üçün ekoloji xəbərdarlıq siqnalıdır. Temperaturun sabit qalmaması bioloji ritmləri alt-üst edir ki, bu da uzunmüddətli perspektivdə ərzaq təhlükəsizliyi və ekoloji balansın qorunmasını çətinləşdirir. Yəni, stabil hava gözləntisi artıq keçmişdə qalıb. İnsanlar gündəlik planlarını qurarkən bir neçə saatlıq proqnozlara güvənməli, sağlamlıqlarını qorumaq üçün geyim seçiminə və immun sisteminə xüsusi diqqət yetirməlidirlər. Həmçinin, evlərin qızdırılması zamanı enerji sərfiyyatındakı qəfil artımlara maddi cəhətdən hazırlıqlı olmaq tövsiyə edilir. (medialoq.az)
14:03 23.01.2026
Oxunuş sayı: 797
