Danimarkanın Baş naziri Mette Frederiksen bu səhər Brüsseldə NATO-nun Baş katibi Mark Rutte ilə görüş keçirib.
Crossmedia.az bu barədə xarici mediaya istinadən xəbər verir.
Görüş zamanı tərəflər NATO-nun Arktikada iştirakının artırılmasının zəruriliyi barədə razılığa gəliblər. Frederiksen və Rutte Arktikanın müdafiəsi və təhlükəsizliyinin təkcə region ölkələrinin deyil, bütün Alyansın ortaq məsuliyyəti olduğunu vurğulayıblar.
Müzakirələrdə Arktikanın artan strateji əhəmiyyəti, bölgədə təhlükəsizlik çağırışları və NATO çərçivəsində koordinasiyanın gücləndirilməsi məsələləri diqqət mərkəzində olub. Görüş Alyansın şimal cinahında təhlükəsizlik siyasətinin daha da aktivləşdiriləcəyinə dair mesaj kimi qiymətləndirilir.
