“İranın COP29-da boş pavilyonu plansızlığın qurbanı olan fürsət idi”
COP29 Konfransına qatılan Tehran Universitetinin professoru Hüseyn Axani beynəlxalq sammitdə İran nümayəndə heyətinin zəif iştirakını tənqid edib.
Crossmedia.az xarici KİV-ə istinadla xəbər verir ki, sammitdə İranın boş qoyduğu pavilyona toxunan professor, bunu ətraf mühit sahəsində elmi və diplomatik qarşılıqlı fəaliyyət üçün dəyərli fürsətin itirilməsinə səbəb olan zəif idarəetmə və heç bir planın olmamasının əlaməti adlandırıb. Axani vurğulayıb ki, planların olmaması və daxili siyasətdə islahatların aparılmasına etinasızlıq İranın qlobal ekoloji səhnədəki mövqeyini zəiflədib.
“İranın Bakıda keçirilən COP29-da boş qalan pavilyonu plansızlığın qurbanı olan bir fürsət idi. Beş gün konfransda olduğum müddətdə İran komandası ilə heç bir əlaqəm olmadı və onların fəaliyyəti ilə bağlı heç bir məlumat almadım. Hətta çıxış etdiyim toplantıların birində İran nümayəndə heyəti iştirak etmədi. İraq kimi ölkələr tədbirə böyük və fəal komandalarla qatılsalar da, İran heç bir şey etmədi”, - professor təəssüflə bildirib.
Onun sözlərinə görə, beynəlxalq səviyyədə hər hansı bir fəaliyyətdən əvvəl daxili siyasətdə islahatlar aparılmalıdır. Məsuliyyətsiz enerji istehlakı və ehtiyatların düzgün idarə olunmaması ölkənin ekologiyasına ziyan vuran əsas səbəblərdir.
12:18 30.11.2024
Oxunuş sayı: 26049
