Xaricdə dilimizi qorumaq bizim məsuliyyətimizdir - Kiyevdəki Azərbaycan dili müəllimi
Azərbaycan Respublikasının Prezidenti İlham Əliyev yanvarın 5-də yerli televiziya kanallarına müsahibəsi zamanı Azərbaycan dilinin qorunmasının və xaricdə yaşayan azərbaycanlıların ana dilini mükəmməl bilməsinin vacibliyini qeyd edib.
Dövlət başçısının müsahibəsini xaricdə yaşayan azərbaycanlılar üçün mühüm yol xəritəsi kimi dəyərləndirilib. Soydaşlarımız bu çıxışın diaspor fəaliyyətinin sistemləşməsinə, milli kimliyin və ana dilinin gələcək nəsillərə ötürülməsinə mühüm töhfə olduğunu bildiriblər.
Xaricdəki həftəsonu məktəbləri və mədəniyyət mərkəzləri vasitəsilə həm soydaşlarımızın, həm də yerli cəmiyyətin dilimizə və mədəniyyətimizə marağı artır.
Ölkəmizin hüdudlarından kənarda Azərbaycan dilinin tədrisində fəal mövqe tutan soydaşlarımızdan biri də Səfayə Naibovadır. O, Kiyevdəki təhsil müəssisələrində yüzlərlə gənc həmvətənimizə və ukraynalıya Azərbaycan dilini öyrədib. “Bizim dilimiz ecazkar, şeirə yatımlıdır. Ukraynalılar da həmişə qeyd edirlər ki, Azərbaycan dili musiqi dilidir. Hətta azərbaycanlı oğlanlarla ailə quran ukraynalı qızlar da Azərbaycan dilini öyrənmək üçün müraciət edirlər”, - deyə Səfayə Naibova söyləyib. Prezident İlham Əliyevin birbaşa diqqəti və Diasporla İş üzrə Dövlət Komitəsinin dəstəyi ilə xarici ölkələrdə Azərbaycan dili məktəblərinin sayının artmaqda olduğunu bildirib: “Hörmətli Prezidentimizin dediyi kimi dilimizi nə qədər çox qorusaq, nə qədər saf, təmiz saxlasaq, o qədər də millətimiz, necə deyərlər, saf olacaq və milli kimliyimiz həmişə bərqərar olacaq”.
15:25 13.01.2026
Oxunuş sayı: 1174
