Safe Circle təhlükəsizlik məlumatının gec paylaşılması problemindən yarandı - Müsahibə
İctimai təhlükəsizlik sahəsində rəqəmsal həllərə ehtiyacın artdığı bir dövrdə azərbaycanlı gənclərin təşəbbüsü ilə yaradılan Safe Circle platforması diqqət çəkir. Londonda qeydiyyatdan keçmiş Quberts texnologiya şirkəti tərəfindən inkişaf etdirilən bu platforma istifadəçilərə hadisələri anonim şəkildə bildirmək, real vaxt rejimində interaktiv xəritə üzərindən təhlükəsizlik vəziyyətini izləmək və mövcud risklər barədə lokasiya əsaslı bildirişlər almaq imkanı yaradır. Safe Circle-ın əsas məqsədi icmaların təhlükəsizlik məlumatına çıxışını genişləndirmək və preventiv yanaşma ilə daha təhlükəsiz mühit formalaşdırmaqdır. Platformada məlumatların gizliliyi GDPR tələblərinə uyğun şəkildə qorunur, istifadəçilər təhlükə növlərinə görə filtr tətbiq edə və şəxsi hesabat tarixçələrini izləyə bilirlər.
Quberts şirkətinin həmtəsisçiləri və eyni zamanda Safe Circle ictimai təhlükəsizlik platformasının yaradıcıları Yusif Cəbrayilov, Fərid Baxışlı və Əli Əbdiyevdir. Şirkət startaplar və bizneslər üçün custom software development, veb və mobil tətbiqlərin hazırlanması, sistem arxitekturasının qurulması və texnoloji məsləhət xidmətləri göstərir. Quberts komandası texnologiyaya yalnız dizayn prizmasından deyil, real problemlərə işlək və dəyər yaradan həllər təqdim edən vasitə kimi yanaşır.
Bu baxımdan Safe Circle ictimai təhlükəsizlik platformasının yaradıcılarından biri olan Yusif Cəbrayılov Crossmedia.az - a müsahibə verib. Həmin müsahibəni oxuculara təqdim edirik.
-Safe Circle ideyası necə yarandı? Konkret bir hadisə, yoxsa ümumi bir boşluq sizi bu platformanı yaratmağa vadar etdi?
-Safe Circle ideyası tək bir hadisədən yox, yaşadığımız müxtəlif ölkələrdə müşahidə etdiyimiz ümumi bir boşluqdan yarandı. Biz özümüz hal-hazırda İspaniyada yaşayırıq, amma bundan əvvəl fərqli şəhər və mühitlərdə olmuşuq. Diqqətimizi çəkən əsas məqam bu idi: gündəlik həyatda insanlar təhlükə ilə üzləşəndə - oğurluq, zorakılıq, şübhəli hallar və s. - bu məlumat ya ümumiyyətlə paylaşılmır, ya da çox gec yayılır. Mövcud rəsmi kanallar əksər hallarda yavaş işləyir, sosial şəbəkələr isə etibarlı və strukturlaşdırılmış məlumat üçün uyğun deyil. Biz gördük ki, insanlar təhlükəsizliklə bağlı məlumatı anonim, sürətli və lokasiya əsaslı şəkildə paylaşa biləcəklərisadə, etibarlı bir platformaya ehtiyac duyurlar. Safe Circle məhz bu ehtiyacdan doğdu - icmaların öz təhlükəsizlik məlumatını özləri üçün daha əlçatan etməsi ideyasından.
-Safe Circle mövcud təhlükəsizlik tətbiqlərindən əsasən nə ilə fərqlənir?
-Safe Circle-ın əsas fərqi onun icma mərkəzli və qeyri-kommersiya yanaşmasıdır. Bir çox təhlükəsizlik tətbiqləri ya kommersiya məqsədlidir, ya da yalnız rəsmi qurumlar üzərindən işləyir. Safe Circle isə istifadəçilərin özlərinin yaratdığı məlumat axınına əsaslanır. Platforma: hadisələrin tam anonim şəkildə bildirilməsinə imkan verir; real vaxt rejimində interaktiv xəritə üzərindən vəziyyəti izləməyə şərait yaradır; istifadəçiyə yalnız onun lokasiyası ilə bağlı real risklərbarədə bildirişlər göndərir. Bizim üçün əsas məqsəd “çox funksiya” deyil, işlək və faydalı məhsul yaratmaqdır. Safe Circle dizayn və texnologiya baxımından sadədir, amma qərar qəbul etməyə kömək edən real məlumat təqdim edir. Bu da onu sadəcə xəbərdarlıq alətindən çox, ictimai təhlükəsizlik üçün praktiki platformaya çevirir.
-İstifadəçi məlumatlarının sui-istifadəsi riskinə qarşı hansı texnoloji və etik yanaşmaları tətbiq edirsiniz?
-Safe Circle yaradılarkən ən önəmli mövzulardan biri gizlilik və etimad olub. Platforma GDPR tələblərinə tam uyğun şəkildə dizayn edilib və mümkün qədər az məlumat toplama prinsipi ilə işləyir. Texnoloji və etik yanaşmalarımıza daxildir: şəxsi identifikasiya edən məlumatların toplanmaması; hadisə bildirişlərinin anonim göndərilməsi; lokasiya məlumatlarının yalnız funksional məqsədlə və məhdud dəqiqliklə istifadə olunması; məlumatların kommersiya məqsədilə üçüncü tərəflərlə paylaşılmaması. Biz Safe Circle-a sadəcə texniki məhsul kimi yox, ictimai məsuliyyət daşıyan platforma kimi baxırıq. Ona görə də “nəyi edə bilərik?” sualından əvvəl həmişə “nəyi etməməliyik?” sualını veririk. İstifadəçinin təhlükəsizliyi bizim üçün texnologiyadan daha önəmlidir.
Sevinc Yarməmmədova
09:22 10.01.2026
Oxunuş sayı: 5415
