Sadaxlıda Dünya Azərbaycanlılarının Həmrəyliyi Günü qeyd olunub
Gürcüstanın Marneuli rayonunun Sadaxlı kəndində yerləşən Təhsil və İnteqrasiya Mərkəzində Dünya Azərbaycanlılarının Həmrəyliyi Günü qeyd olunub.
Crossmedia.az bu barədə Diasporla İş üzrə Dövlət Komitəsinə istinadən xəbər verir.
Mərkəzin müəllimləri Həmrəylik Gününün milli birliyin və ümummilli dəyərlərin qorunması baxımından xüsusi əhəmiyyət daşıdığını vurğulayıblar. Bu əlamətdar günün xaricdə yaşayan azərbaycanlıların öz milli kimliklərinə bağlılığının möhkəmləndirilməsində, ana dilinin, mədəniyyətin və adət-ənənələrin yaşadılmasında mühüm rol oynadığını söyləyiblər.
Qeyd edək ki, Sadaxlı Təhsil və İnteqrasiya Mərkəzi fəaliyyətində milli-mənəvi dəyərlərin qorunmasına xüsusi diqqət yetirir, gənc nəslin ana dilimizə, mədəniyyətimizə və adət-ənənələrimizə bağlı ruhda formalaşmasına töhfə verir. Mərkəzdə keçirilən maarifləndirici və mədəni tədbirlər milli kimliyin yaşadılması və gələcək nəsillərə ötürülməsi baxımından mühüm əhəmiyyət daşıyır.
15:22 07.01.2026
Oxunuş sayı: 1558
