Sosium

Dünya Azərbaycanlılarının Həmrəyliyi Gününün əhəmiyyəti

Dünya Azərbaycanlılarının Həmrəyliyi Günü hər il 31 dekabr tarixində qeyd olunur. Bu tarix, xalqımızın milli birlik və mənəvi bütövlüyünü ifadə edən ən mühüm tarixlərdən biridir. Bu gün dünyanın müxtəlif ölkələrində yaşayan milyonlarla azərbaycanlını vahid amal, ortaq tarix və milli dəyərlər ətrafında birləşdirir.

İlk növbədə, bu günün əhəmiyyəti milli kimliyin qorunması ilə bağlıdır. Xaricdə yaşayan azərbaycanlılar üçün ana dilinin, mədəniyyətin, adət-ənənələrin yaşadılması və gələcək nəsillərə ötürülməsi məhz həmrəylik ideyası sayəsində mümkün olur. Bu birlik milli özünüdərkin möhkəmlənməsinə xidmət edir.

Bu əlamətdar günün təməli 1989-cu ilin dekabrında Naxçıvan Muxtar Respublikasında atılmışdır. Həmin dövrdə Araz çayı boyunca çəkilmiş süni sərhədlərin sökülməsi xalqın parçalanmaya etirazının və milli birliyə çağırışının rəmzinə çevrildi. 1991-ci ildə Ulu Öndər Heydər Əliyevin təşəbbüsü ilə 31 dekabr rəsmi olaraq Dünya Azərbaycanlılarının Həmrəyliyi Günü elan edildi.

Bu günün əsas əhəmiyyətlərindən biri milli kimliyin qorunması və yaşadılmasıdır. Qloballaşan dünyada assimilyasiya təhlükəsi ilə üz-üzə qalan xaricdəki azərbaycanlılar üçün həmrəylik ideyası milli mənsubiyyətin qorunmasının başlıca təminatıdır. Ana dilinin unudulmaması, milli-mənəvi dəyərlərin yaşadılması, tariximizin düzgün təbliği məhz bu birlik ruhu sayəsində mümkün olur.

Müasir dövrdə Dünya Azərbaycanlılarının Həmrəyliyi bu gün Prezident İlham Əliyevin rəhbərliyi ilə uğurla davam etdirilir.

Dünya Azərbaycanlılarının Həmrəyliyi Günü eyni zamanda diaspor gücünün formalaşması və koordinasiyası baxımından mühüm rol oynayır. Mütəşəkkil və məqsədyönlü diaspor fəaliyyəti Azərbaycanın haqq səsinin beynəlxalq aləmdə eşidilməsinə, milli maraqlarımızın müdafiəsinə və ölkəmizlə bağlı obyektiv məlumatların yayılmasına şərait yaradır.

Bu günün əhəmiyyəti dövlətçilik, vətənpərvərlik ruhunun güclənməsi və milli həmrəylik ideyalarının möhkəmlənməsi ilə də ölçülür. Xüsusilə müasir dövrdə, Prezident İlham Əliyevin rəhbərliyi ilə əldə olunan tarixi nailiyyətlər, o cümlədən 44 günlük Vətən müharibəsində qazanılan Qələbə dünya azərbaycanlılarının birliyinin real gücə çevrildiyini nümayiş etdirdi.

Eyni zamanda, Həmrəylik Günü tarixi ədalətin bərpası və milli maraqların müdafiəsi baxımından da xüsusi məna daşıyır. Dünyanın harasında yaşamasından asılı olmayaraq, hər bir azərbaycanlı bu gün vasitəsilə Vətənlə mənəvi bağını möhkəmləndirir və ümummilli məsuliyyətini dərk edir.

Nəticə etibarilə, Dünya Azərbaycanlılarının Həmrəyliyi Günü xalqımız üçün təkcə təqvimdə bir tarix deyil, birlikdən güc doğduğunu sübut edən milli ideya, mənəvi dayaq və gələcəyə inam rəmzidir. Bu gün Azərbaycan xalqının parçalanmaz birliyini və qlobal miqyasda varlığını təsdiqləyir.

“Dünya Azərbaycanlılarının Həmrəyliyi Günü”müz mübarək!