Beynəlxalq Muğam Mərkəzində "Ey Vətən" adlı konsert proqramı keçirilib
Beynəlxalq Muğam Mərkəzində Dünya Azərbaycanlılarının Həmrəyliyi Günü və Yeni il münasibətilə "Ey Vətən" adlı konsert proqramı keçirilib. Tədbir "Bizi Birləşdirən Mədəniyyət" İctimai Birliyinin təşkilatçılığı, Qeyri-Hökumət Təşkilatlarına Dövlət Dəstəyi Agentliyinin və Beynəlxalq Muğam Mərkəzinin tərəfdaşlığı ilə baş tutub.
Konsert proqramı məxsusi olaraq qeyri-hökumət təşkilatlarının nümayəndələri üçün hazırlanıb. Musiqi gecəsində görkəmli vokal ustası, Əməkdar artist Ramil Qasımovun ifasında zəngin və rəngarəng repertuar təqdim olunub. İfaçını fortepianoda Xalq artisti, professor Siyavuş Kərimi və Əməkdar artist Emil Əfrasiyab müşayiət edib.
Proqramda Oqtay Kazıminin "Ey xəyal", Rauf Hacıyevin "Bahar sənsiz", Cahangir Cahangirovun "Zərif gülüşlüm" və "Alagöz", Tofiq Quliyevin "Sənə də qalmaz" əsərləri, xalq mahnıları və instrumental nömrələr səsləndirilib.
Konsert çərçivəsində Azərbaycan opera sənətinin klassik nümunələrinə də xüsusi yer ayrılıb. Belə ki, Üzeyir Hacıbəylinin "Arşın mal alan" operettasından Əsgərin ariyası, Pikə Axundovanın "Məhsəti" operasından Əmir Əhmədin ariyası, eləcə də Siyavuş Kəriminin “Nəsimi” operasından Nəsiminin ariyası ifa olunub. Musiqi gecəsi Elza İbrahimovanın "Ey Vətən" əsəri ilə yekunlaşıb.
Tədbir iştirakçılar tərəfindən böyük maraqla qarşılanıb və milli musiqimizin həmrəylik və vətənpərvərlik ruhunu bir daha nümayiş etdirib.
20:13 28.12.2025
Oxunuş sayı: 1247
