Əlcəzairdə Azərbaycan nəbzi: Xumar Nəbiyeva ilə mədəniyyət və diaspora səyahəti - MÜSAHİBƏ
Qloballaşan dünyada diaspora fəaliyyəti milli maraqların qorunması və beynəlxalq ictimaiyyətə çatdırılması baxımından böyük əhəmiyyət kəsb edir. Xaricdə yaşayan azərbaycanlıların təşkilatlanması və vahid mövqedən çıxış etməsi bu prosesdə əsas rol oynayır. Hər bir həmvətənimizin fəaliyyəti milli həmrəyliyi gücləndirir və ölkəmizin dünyada tanınmasına töhfə verir. Bu baxımdan, Crossmedia.az Analitik informasiya Portalı olaraq “Zəfər Diasporu” rubrikamız çərçivəsində növbəti müsahibəmizi və müsahibimizi təqdim edirik.
Rubrikanın yeni müsahibi Xumar Nəbiyevadır. O, Bakı şəhərində anadan olmuş və 2004-cü ildən Əlcəzairdə yaşayan azərbaycanlı diaspor fəalıdır. O, üç övlad anası olmaqla yanaşı, “Karbohidrogenlərin iqtisadiyyatı” ixtisası üzrə magistr təhsilini başa vurub. 2015-ci ildən etibarən Xumar Nəbiyeva “Kokorje Art” brendi vasitəsilə bəzək əşyaları və suvenirlər hazırlayır. Eyni zamanda, o, Əlcəzairdə Azərbaycan mədəniyyətinin təbliği ilə fəal məşğuldur. Xumar müxtəlif televiziya verilişlərində, beynəlxalq sərgilərdə iştirak edir və milli rəqslər, mətbəx və ənənəvi geyimlər kimi Azərbaycan mədəniyyətinin elementlərini tanıdır.
Azərbaycan Diasporla İş üzrə Dövlət Komitəsinin təşəbbüsü və Azərbaycan Respublikasının Əlcəzairdəki Səfirliyinin dəstəyi ilə Xumar Nəbiyeva ailə mühitində Azərbaycan mədəniyyətinin yayılmasına da töhfə verir: o və övladları öz əlləri ilə hazırlanan milli geyimləri geyinir və Azərbaycan yeməklərini bişirirlər.
Ona suallarımız da fəaliyyəti və gördüyü işlərlə bağlı oldu:
-Azərbaycanla-Əlcəzair arasında mədəni əlaqələrin inkişafı hansı mərhələdədir?
-Azərbaycanla Əlcəzair arasında mədəni əlaqələr formalaşma və inkişaf mərhələsindədir. Son illərdə iki ölkə arasında siyasi və diplomatik münasibətlərin möhkəmlənməsi mədəni əməkdaşlıq üçün də əlverişli zəmin yaradıb.
-Əlcəzairdə Azərbaycan mədəniyyətinin təbliğinə qaneedici demək olarmı? Daha nə işlər görmək olar?
-Hazırkı mərhələdə Azərbaycan mədəniyyətinin təbliği mövcuddur lakin gələcəkdə mədəni sərgilərin, milli incəsənət günlərinin, musiqi və əl sənəti festivallarının təşkili, universitetlərdə təqdimatlar, eləcə də Azərbaycan mədəni irsinin yerli mediada daha geniş işıqlandırılması bu sahədə mühüm rol oynaya bilər.
-Xumar Nəbiyeva Əlcəzairdə yaşadığı müddətdə həm şəxsi, həm də peşə həyatını necə balanslaşdırıb?
-Əlcəzairdə yaşamaq mənim üçün həm böyük təcrübə, həm də məsuliyyət olub.Eyni zamanda, yaşadığım ölkənin mədəniyyətinə hörmətlə yanaşmaqla yanaşı, öz milli kimliyimi və dəyərlərimi də daim qorumuşam. Bu balans mənə həm fərdi inkişaf, həm də peşəkar fəaliyyətimi uğurla davam etdirmək imkanı verib.
Bu imkanlardan səmırəli şəkildə istifadə edib Azərbaycanın milli dəyərlərinin, mədəniyyətinin səsi daha da yüksəklərdən gəlməsinə çalışıram.
Görülən işlərdə mənə destək olan diaspora komitəmiz və burada ki səfirliyimizə minnətdarlığımı bilddirirəm.Birlik və dəstək olduğu yerdə müvəffəqiyyətli nəticələrə nail olunur.
-"Kokorje Art” brendi vasitəsilə Azərbaycan mədəniyyətini təbliğ etmək onun üçün hansı strateji əhəmiyyət kəsb edir?
-“Kokorje Art” mənim üçün sadəcə bir sənət brendi deyil, Əlcəzair kütləsi ilə bir ünsiyyət körpüsüdür. Onun sayəsində Tv kanallarında daha çox Azərbaycan mətbəxi , mədəniyyəti ve digər mövzularda çıxışlarım, rəqslərim, milli geyimlərimin nümayişi v.s reallaşmişdir.Strateji baxımdan bu, mədəni diplomatiyanın qeyri-rəsmi, lakin təsirli bir formasıdır.
Gələcəkdə görüləsi çoxlu iş planım var , onlar həyata keçdikcən böyük məmuniyyətlə sizlərlə paylaşacam.
-Azərbaycan dövlətinin Əlcəzairdə diasporaya dəstəyi ilə bağlı nə deyə bilərsiniz?
-Azərbaycan dövləti diasporanın inkişafına və fəaliyyətinə xüsusi diqqət göstərir. Bu dəstək diaspor üzvlərinə həm mənəvi güc verir, həm də fəaliyyətlərini daha sistemli şəkildə qurmağa imkan yaradır.Əlcəzairdə vətəndaşlarımız sayı demək olarki çox az olduğundan diaspor fəalı mən və ailəmdir. Son zamanlar Diaspora komitəsinin bizləri dəstəkləməsi çox sevindirici haldır və danılmazdır.
-Qarşıdan gələn Dünya Azərbaycanlılarının Həmrəyliyi Günü münasibətilə Azərbaycan xalqına nə deyə bilərsiniz? 2026-cı ildən gözləntiləriniz nələrdir?
-Dünya Azərbaycanlılarının Həmrəyliyi Günü münasibətilə bütün soydaşlarımı səmimi qəlbdən təbrik edirəm.Harada yaşamağımızdan asılı olmayaraq, Azərbaycan adı bizi bir amal ətrafında birləşdirir.
2026-cı ildən gözləntilərim diaspor fəaliyyətinin daha da güclənməsi, Azərbaycan mədəniyyətinin dünyada daha geniş tanınması və gənc nəslin milli dəyərlərə bağlı şəkildə formalaşmasıdır. İnanıram ki, birlik və həmrəylik sayəsində daha böyük uğurlara imza atacağıq.
Mehriban İbrahimli
11:15 28.12.2025
Oxunuş sayı: 1721
