Təhsil alan hər bir qız gələcəyin güclü qadını, cəmiyyətin isə sarsılmaz sütunudur
Azərbaycanda qadınların təhsilinə verilən dəyər parlaq gələcəyin təməlidir. Ailə, Qadın və Uşaq Problemləri üzrə Dövlət Komitəsi, Elm və Təhsil Nazirliyi və Təhsilin İnkişafı Fondunun birgə əməkdaşlığı ilə uğurla icra olunan "Hənifə Məlikova-Zərdabi adına qızların təhsilinə dəstək" təqaüd proqramı bu yolda atılan ən mühüm addımlardan biridir.
Bu proqramın qaliblərindən biri Bakı Dövlət Universitetinin Hüquq fakültəsinin II kurs tələbəsi Günel Həsənlidir, onun hekayəsi bizə göstərir ki, doğru dəstək və sarsılmaz iradə birləşdikdə uğur qaçılmaz olur.
Uşaqlıqdan hüquq sahəsinə xüsusi maraq göstərən Günel Həsənli bu ixtisası yalnız peşə kimi deyil, cəmiyyətə fayda vermək, ədalətə xidmət etmək vasitəsi kimi dəyərləndirir. Onun sözlərinə görə, hüquq sahəsini seçməsində əsas məqsəd insanların hüquqlarının qorunması, pozulmuş hüquqların bərpası və hüquqi maarifləndirmənin gücləndirilməsidir.
"Xüsusilə dövrümüzdə qadınların hüquqlarının pozulması məni daha çox narahat edirdi. Hüquq fakültəsinə daxil olmaq məqsədlərimə çatmağa məni bir addım da yaxınlaşdırdı", – deyə o bildirib.
Gənc hüquqşünas hüquq təhsili almaq istəyənlərlə öz tövsiyələrini bölüşüb. O vurğulayıb ki, bu sahəni seçən hər bir gənc qətiyyətli və özünəinamlı olmalı, daim öz üzərində işləməlidir: "Hüquq elə bir sahədir ki, davamlı araşdırma tələb edir. Yaxşı hüquqşünas olmaq üçün yalnız dərslərlə kifayətlənmək olmaz, əlavə mənbələrə müraciət etmək vacibdir. Ən əsası isə vicdanlı və ədalətli hüquqşünas olmağı hədəf seçmək lazımdır".
"Hənifə Məlikova–Zərdabi adına qızların təhsilinə dəstək" təqaüd proqramının Günel Həsənlinin inkişafında xüsusi rolu olub.
Təqaüd proqramı çərçivəsində keçirilən təlim və seminarların əhəmiyyətindən bəhs edən Günel Həsənli bu tədbirlərin bilik və dünyagörüşünün genişlənməsində mühüm rol oynadığını vurğulayır. Bu təlimlər arasında onun üçün ən maraq doğuran isə Təhsilin İnkişafı Fondu və "STP Şirkətlər Qrupu"nun əməkdaşlığı çərçivəsində "Access Bank"ın təhsil və inkişaf üzrə meneceri Xumar Hüseynova tərəfindən keçirilən "Maliyyə savadlılığı" mövzusunda sessiya olub. Onun sözlərinə görə, təlim zamanı karyera üstünlüyü modeli, məşğulluğun əsas komponentləri, maliyyə stresinin iş mühitinə təsiri, eləcə də büdcə planlaması ilə bağlı praktiki yanaşmalar müzakirə edilib.
Təhsil alan hər bir qız gələcəyin güclü qadını, cəmiyyətin isə sarsılmaz sütunudur. Günel Həsənli kimi gənclərin uğur hekayələri sübut edir ki, investisiya edilən ən böyük sərvət bilikdir. O, bu cür təşəbbüslərin ölkədə qızların təhsilinə verilən yüksək dəyərin bariz nümunəsi olduğunu qeyd edir. Günel əmindir ki, hər bir qızın uğur hekayəsi təhsildən başlayır və savadlı, məqsədyönlü gənclər Azərbaycanın gələcək inkişafında mühüm rol oynayacaq.
Nigar Yahyazadə
17:42 25.12.2025
Oxunuş sayı: 1830
