Polkovnik: Ali Baş Komandan, üstəgəl güclü ordu quruculuğu qələbəyə bərabərdir -MÜSAHİBƏ
Müasir Azərbaycanın hərbi gücünün formalaşması, güclü və peşəkar ordunun yaradılması ölkə başçısının strateji baxışının, qətiyyətli siyasi iradəsinin və ardıcıl dövlət siyasətinin bariz nümunəsidir. Dövlət müstəqilliyimizin möhkəmləndirilməsi, ərazi bütövlüyümüzün təmin olunması və milli təhlükəsizliyimizin etibarlı qorunması məhz həyata keçirilən məqsədyönlü ordu quruculuğu siyasətinin əsas nəticələrindəndir.
Son illər ərzində Silahlı Qüvvələrin maddi-texniki bazasının gücləndirilməsi, müasir silah və texnologiyalarla təchizat, kadr hazırlığının beynəlxalq standartlara uyğunlaşdırılması və orduda peşəkarlığın artırılması ölkə rəhbərliyinin bu sahəyə verdiyi xüsusi önəmin göstəricisidir. Azərbaycan Ordusunun regionun ən güclü ordularından birinə çevrilməsi isə dövlət başçısının uzaqgörən siyasətinin, milli maraqlara söykənən qərarlarının və orduya göstərilən daimi diqqət və qayğının məntiqi nəticəsidir.
Cənab Prezidentin ölkənin ordu quruculuğu və hərbi sahədə gördüyü işlərlə bağlı hərbi ekspert, ehtiyatda olan polkovnik Şair Ramaldanov Crossmedia.az-la öz fikirlərini bölüşüb:
– Cənab Prezidentin Ali Baş Komandan kimi Silahlı Qüvvələrin inkişafında rolunu necə qiymətləndirirsiniz?
– Azərbaycan Silahlı Qüvvələrinin bu günkü gücü və döyüş qabiliyyəti birbaşa Ali Baş Komandan, cənab Prezident İlham Əliyevin apardığı ardıcıl, məqsədyönlü və uzaqgörən siyasətin nəticəsidir. Bunu şərti olaraq bir arifmetik düsturla ifadə etsək, deyə bilərik ki, Ali Baş Komandan, üstəgəl güclü ordu quruculuğu qələbəyə bərabərdir.
Cənab Prezident Ulu Öndər Heydər Əliyevin müəyyən etdiyi ordu quruculuğu prinsiplərinə sadiq qalaraq bu siyasəti müasir çağırışlara uyğun şəkildə inkişaf etdirdi. Ordu quruculuğu tam şəkildə XXI əsrin tələblərinə cavab verən konsepsiya əsasında həyata keçirildi, Azərbaycan Ordusu ən müasir silah və texnika ilə təchiz olundu, döyüş aparma qabiliyyəti keyfiyyətcə yeni mərhələyə yüksəldi. Nəticə etibarilə Azərbaycan Ordusu həm texnoloji, həm də taktiki baxımdan müasir müharibə aparmağa qadir gücə çevrildi.
– Ermənistanın illərlə qurduğu möhkəm müdafiə xəttinin yarılması hansı amillər hesabına mümkün oldu?
– Məlumdur ki, düşmən 30 ilə yaxın işğal dövründə, əsasən Rusiya hərbi doktrinasına əsaslanan çoxpilləli, dərin eşalonlaşdırılmış müdafiə xətti qurmuşdu və bu müdafiəni keçilməz hesab edirdi. Əgər Azərbaycan Ordusu köhnə, klassik döyüş yanaşmaları ilə hərəkət etsəydi, doğrudan da bu xəttin yarılması olduqca çətin olardı. Məhz buna görə qeyri-ənənəvi və yeni yanaşma tələb olunurdu. Bu yanaşmanın əsasında müasir silah sistemlərinin mənimsənilməsi, onların döyüş meydanında effektiv tətbiqi və bu silahlara uyğun yeni taktiki üsulların hazırlanması dayanırdı. Çünki hər bir taktiki qərar birbaşa istifadə olunan silahlarla bağlıdır. Yeni silahlar yeni taktiki imkanlar yaratdı, bu da Azərbaycan Ordusuna döyüş meydanında çevik, sürətli və üstün manevr imkanları qazandırdı. Düşmən isə bu cür müasir döyüş üslubuna hazır deyildi.
– Bu uğurların əldə olunmasında genişmiqyaslı hərbi təlimlərin və Ali Baş Komandanın rolu nə dərəcədə həlledici idi?
– Azərbaycan Ordusunun qələbəyə aparan yolunda genişmiqyaslı hərbi təlimlərin rolu xüsusi qeyd olunmalıdır. Son illərdə 5, 10, 15, hətta 25 minə yaxın şəxsi heyətin iştirakı ilə mütəmadi olaraq irimiqyaslı təlimlər və hərbi oyunlar keçirilirdi. Bu təlimlər zamanı real döyüş ssenariləri, işğal altındakı ərazilərin azad olunması variantları praktiki şəkildə məşq edilirdi. Ən vacib məqam isə ondan ibarət idi ki, bütün bu təlimlərin ssenariləri məhz Ali Baş Komandan cənab Prezident İlham Əliyev tərəfindən təsdiqlənirdi. Prezidentin dəfələrlə qeyd etdiyi kimi, əsas qərarları şəxsən özü qəbul edirdi. Bu isə onu göstərirdi ki, Ali Baş Komandan bütün mümkün istiqamətlər üzrə yaranacaq vəziyyətləri dərindən bilirdi, riskləri qiymətləndirə bilirdi və kritik məqamlarda operativ qərar qəbul etmək bacarığına malik idi. Bütün bu amillər kompleks şəkildə Azərbaycan Ordusunu qələbəyə aparan əsas şərtlərdən biri oldu.
– Hərbi qələbə ilə yanaşı, diplomatik müstəvidə görülən işləri və müharibədən sonrakı mərhələni necə dəyərləndirirsiniz?
– Cənab Prezidentin yanaşması ondan ibarət idi ki, “yüz ölç, bir biç”. Aprel döyüşləri zamanı Azərbaycan Ordusu öz gücünü göstərsə də, beynəlxalq müstəvidə risklər tam aradan qaldırılmadan genişmiqyaslı əməliyyata başlanmadı. Prezident paralel şəkildə diplomatiya meydanında ciddi hazırlıq aparırdı. Diplomatik cəbhədə əldə edilən uğurlar, beynəlxalq risklərin minimuma endirilməsi, qardaş Türkiyə və dost Pakistanın açıq siyasi-mənəvi dəstəyi nəticə etibarilə Azərbaycanın hərbi əməliyyatlara başlamaq üçün əlverişli şərait formalaşdırdı. 44 günlük Vətən müharibəsində əldə edilən tarixi Qələbə və sonrakı antiterror tədbirləri ilə Azərbaycanın suverenliyinin tam bərpası bunu bir daha sübut etdi. Müharibədən sonra isə Azərbaycan Ordusu yeni inkişaf mərhələsinə qədəm qoydu – döyüşdə sınaqdan çıxmış silahlar əsasında silahlanma siyasəti aparıldı, Türkiyə modeli tətbiq edildi, Azərbaycan–Türkiyə birgə təlimlərinin sayı kəskin artırıldı. Bu gün Azərbaycan Ordusu regionda təhlükəsizliyin əsas təminatçılarından biridir və bu ordunun başında müzəffər Ali Baş Komandan, Azərbaycan Respublikasının Prezidenti cənab İlham Əliyev dayanır.
11:49 24.12.2025
Oxunuş sayı: 9907
