Stokholmda Dünya Azərbaycanlılarının Həmrəyliyi Günü qeyd edilib
İsveçin paytaxtı Stokholmda 31 Dekabr - Dünya Azərbaycanlılarının Həmrəyliyi Günü və Yeni il bayramı təntənəli şəkildə qeyd edilib.
Crossmedia.az bu barədə Diasporla İş Üzrə Dövlət Komitəsinə istinadən xəbər verir.
İsveç–Azərbaycan Birliyi (SAF) və Azərbaycan Mədəniyyət Dərnəyinin birgə təşkilatçılığı ilə baş tutan tədbir Azərbaycan Respublikasının Dövlət Himninin səsləndirilməsi ilə başlayıb.
Tədbirdə İsveç-Azərbaycan Birliyinin sədri Sevda Dadaşova, Azərbaycan Mədəniyyət Dərnəyinin sədri Səməd İlkinli, Azadlıq Dərnəyinin sədri Əsəd Asadi, Beynəlxalq Media Qrupun sədri, rejissor Rahim Sadıqbəyli, Qarabağ Cəmiyyətinin sədri Cavanşir Əmir Haşımi, Stokholmdakı Şimali Kipr Türk Nümayəndəliyinin rəhbəri Hakan Aksoy və Qobustan Aydınlar Ocağının sədri Səadət Kərimi çıxış ediblər.
Çıxışlarda milli həmrəyliyin, ana dilin, mədəniyyətin və dövlətçilik dəyərlərinin qorunaraq gələcək nəsillərə ötürülməsinin hər bir soydaşımızın müqəddəs borcu olduğu vurğulanıb. Ulu Öndər Heydər Əliyevin misilsiz xidmətlərinin nəticəsində mümkün olan həmrəyliyin Prezident İlham Əliyevin tarixi qələbələri, ərazi bütövlüyümüzün bərpası ilə zirvə nöqtəyə çatdığı qeyd edilib.
Bayram tədbiri konsert proqramı ilə davam edib. Türkiyədən müğənni Cavid Təbrizli və Azərbaycandan Günel Həmdili şən musiqilərlə tədbir iştirakçılarına xoş ovqat bəxş ediblər.
15:07 23.12.2025
Oxunuş sayı: 1321
