Memarlar İttifaqının İdarə Heyətinin 2025-ci ilin yekunlarına həsr olunmuş Plenumu keçirilib
Azərbaycan Memarlar İttifaqının İdarə Heyətinin Plenumu keçirilib.
Crossmedia.az xəbər verir ki, plenumun açılışında Azərbaycan Memarlar İttifaqının İdarə Heyətinin sədri Elbay Qasımzadə çıxış edərək qonaqları və iclas iştirakçılarını salamlayıb, plenumun gündəliyi barədə məlumat verib.
Plenumun işinə başlamazdan əvvəl Azərbaycan Memarlar İttifaqının İdarə Heyətinin üzvləri yubilyar memarları təbrik edib.
Sonra Memarlar İttifaqlarının Beynəlxalq Assosiasiyası tərəfindən bu ilin oktyabr ayında Astanada keçirilmiş “İlin ən yaxşı layihəsi/tikilisi” üzrə XXXIII Beynəlxalq baxış-müsabiqəsinin qalibləri mükafatlandırılıb. Belə ki, “Şəhərsalma kompleksləri və ansamblları” nominasiyası üzrə “Həyata keçirilmiş tikili” kateqoriyasında 2-ci dərəcəli diploma "Foglie Dalloro" şirkəti tərəfindən təqdim olunmuş Şuşa şəhərində yerləşən “Şuşa” Otel-Konqres Mərkəzi, “Çap nəşri” nominasiyası üzrə 2-ci dərəcəli diploma isə Nərgiz Ağayevanın “İnteryer qrafikası” adlı metodik vəsaiti layiq görülüb. Qaliblərə diplomlar və gül dəstələri təqdim edilib.
Bundan sonra plenum öz işinə başlayıb.
Plenumun gündəliyinə uyğun olaraq, Azərbaycan Memarlar İttifaqının İdarə Heyətinin 2025-ci il ərzində gördüyü işlər barədə sədr Elbay Qasımzadənin məlumatı dinlənilib. Sonra Azərbaycan Memarlar İttifaqının Təftiş Komissiyasının sədri Rövşən Səmədov tərəfindən 2025-ci il üzrə komissiyanın hesabatı təqdim olunub. Hesabatlar müzakirə edilərək səsə qoyulub və qənaətbəxş qəbul edilib.
Gündəlik üzrə növbəti məsələ - Azərbaycan Memarlar İttifaqının yaradıcılıq komissiyalarının fəaliyyəti barədə məsələ müzakirə edilib, komissiyaların tərkibi barədə təkliflər dinlənilib və müzakirə olunub.
Sonra Memarlar İttifaqının 2026-cı il üçün tədbirlər planının layihəsinə baxılıb. Qeyd edilib ki, 2026-cı il üzrə ən vacib tədbir - Azərbaycan Memarlar İttifaqının yaranmasının 90 illiyinin qeyd edilməsidir. Bu münasibətlə silsilə tədbirlərin həyata keçirilməsi müzakirə olunub. Tədbirlər planı layihəsinə bir neçə tədbir əlavə olunub, plan səsə qoyulub və təsdiq edilib. Plenumda qaldırılan məsələlər üzrə müvafiq qərarlar qəbul olunub.
Tədbirin sonunda Azərbaycan Memarlar İttifaqının İdarə Heyətinin Plenumunun Qətnaməsi iclas iştirakçılarına təqdim edilib, müzakirələrdən sonra səsə qoyulub və qəbul edilib. Bununla da Plenum öz işini başa çatdırıb.
18:32 17.12.2025
Oxunuş sayı: 868
