Daşkənddə Ulu Öndər Heydər Əliyev irsi böyük ehtiramla yaşadılır
Müasir müstəqil Azərbaycan dövlətinin memarı və qurucusu, dünyaşöhrətli siyasi xadim, Ümummilli Lider Heydər Əliyev təkcə Azərbaycanda deyil, qardaş Özbəkistanda da böyük ehtiramla yad olunur.
Crossmedia.az bu barədə Diasporla İş Üzrə Dövlət Komitəsinə istinadən xəbər verir.
Özbəkistanda fəaliyyət göstərən Respublika Azərbaycan Milli Mədəniyyət Mərkəzinin (RAzMMM) İdarə Heyətinin üzvləri Daşkənd şəhərinin Mirabad rayonunda yerləşən Heydər Əliyev adına bağa gələrək Ümummilli Liderin büstünü ziyarət edib, önünə gül dəstələri düzüblər.
Anım mərasimində çıxış edən RAzMMM nümayəndələri Ulu Öndər Heydər Əliyevin yalnız Azərbaycan üçün deyil, həm də türk dünyası üçün böyük şəxsiyyət, dərin zəkası və siyasi uzaqgörənliyi ilə seçilən lider olduğunu vurğulayıblar. Onun türk dövlətləri ilə, o cümlədən Özbəkistan ilə münasibətlərin inkişafına verdiyi töhfələrin bu gün iki ölkə arasındakı qardaşlıq münasibətlərinin əsasını təşkil etdiyini söyləyiblər. Son illərdə Azərbaycan Respublikasının Prezidenti, Müzəffər Ali Baş Komandan İlham Əliyev və Özbəkistan Respublikasının Prezidenti Şavkat Mirziyoyevin bu dostluq münasibətlərini daha da möhkəmləndirib, strateji tərəfdaşlığı ən yüksək səviyyəyə yüksəltdiyi qeyd olunub. Bu gün Özbəkistanın müxtəlif bölgələrində Heydər Əliyevin adına parkların, mədəniyyət guşələrinin yaradılması, onun zəngin irsinin gənc nəslə çatdırılması Ulu Öndərə olan sevgi və hörmətin bariz nümunəsi kimi dəyərləndirilib.
Özbəkistanda yaşayan və fəaliyyət göstərən Azərbaycan diasporunun Ümummilli Lider Heydər Əliyevin milli ideologiya və birliyə xidmət edən prinsip və dəyərləri yaşatdığı bildirilib.
01:25 17.12.2025
Oxunuş sayı: 958
