Azərbaycan və Belarus hərbi əməkdaşlığı genişləndirir - Ekspert detalları açıqladı
Azərbaycan və Belarus Müdafiə nazirlikləri arasında 2025-ci il üçün ikitərəfli hərbi əməkdaşlıq planına əsasən, Belarus nümayəndə heyəti ilə "Pilotsuz aviakomplekslərin tətbiqi və pilotsuz uçuş aparatları operatorlarının hazırlanması sahəsində əməkdaşlığa dair işçi görüş" keçirilib.
Görüş zamanı insansız hava sistemləri sahəsində ətraflı fikir mübadiləsi aparılıb. Tərəflər bu istiqamətdə əməkdaşlığın genişləndirilməsi imkanlarını dəyərləndirərək maraq doğuran bir sıra məsələləri müzakirə ediblər.
İki ölkə arasında hərbi sahədə əməkdaşlığın inkişafı barədə Crossmedia.az-a danışan hərbi ekspert Ədalət Verdiyev bildirib ki, Azərbaycanla Belarus arasında müdafiə, hərbi-texniki və xüsusi təyinatlı avadanlıqlar sahəsində əməkdaşlıq son illər daha da intensivləşib.
"Belarus istehsalı olan silah sistemləri və xüsusi texnikalar Azərbaycanın ilk əldə edən tərəfdaş ölkələrindən biridir. Xüsusilə pilot əleyhinə vasitələr sahəsində hər iki ölkənin topladığı təcrübə qarşılıqlı texnoloji mübadilə üçün ciddi əsas yaradır. Bu təcrübənin paylaşılması yeni taktiki həllərin hazırlanmasına, həmçinin hava təhlükəsizliyi sahəsində daha səmərəli mübarizə metodlarının formalaşmasına imkan verə bilər".
Onun sözlərinə görə, yaxın perspektivdə Azərbaycanla Belarus arasında əməkdaşlığın inkişaf edəcəyi başlıca istiqamətlərdən biri də pilotsuz uçuş aparatları və onlara qarşı mübarizə sistemləri olacaq.
Mehriban İbrahimli
13:04 06.12.2025
Oxunuş sayı: 1447
