Mertz Qəzza ilə bağlı Trampın planını dəstəklədi
Almaniya kansleri Fridrix Mertz Fələstin prezidenti Mahmud Abbasla telefon danışığı aparıb.
Crossmedia.az xarici mətbuata istinadən xəbər verir ki, bu barədə Almaniya hökumətinin rəsmi nümayəndəsi Ştefan Kornelius məlumat verib.
Danışıq zamanı Yaxın Şərqdə sülhün əldə edilməsi perspektivləri müzakirə olunub. Xüsusilə Mertz ABŞ prezidenti Donald Trampın Qəzza zolağındakı böhranın həlli ilə bağlı planını dəstəkləyib.
Mertzin fikrincə, Fələstin Milli Administrasiyası (FMA) təcili olaraq zəruri islahatların həyata keçirilməsinə başlamalıdır.
“Əsas məqsəd iki dövlət əsasında həll yoluna nail olmaq olmalıdır”, — deyə, Almaniya kansleri bildirib.
13 oktyabrda Tramp Qəzza zolağındakı münaqişənin başa çatdığını elan edib. Bununla belə, o daha sonra xəbərdarlıq edib ki, əgər Fələstin hərəkatı HƏMAS silahı təhvil verməkdən imtina etsə, İsrail ordusu Qəzzada əməliyyatları bərpa edəcək.
3 noyabrda Asharq Al-Awsat nəşri xəbər verib ki, HƏMAS atəşkəs razılaşması çərçivəsində ağır silahları təhvil verə bilər. Hərəkat həmçinin “Qəzza ərazisində hər hansı silah hazırlamayacağına və sektora silah qaçaqmalçılığı ilə məşğul olmayacağına” dair öhdəlik götürüb.
Bundan əvvəl Nebenzya ABŞ-ın Qəzzaya dair qətnaməsini “pişik torbada” adlandırmışdı.
Pərvin Hacıyeva
15:29 06.12.2025
Oxunuş sayı: 1031
