Orta aylıq əməkhaqqı artırılır: İqtisadçı rəqəmlərlə danışdı
Bakıda orta aylıq əməkhaqqının 9%-ə yaxın artması ilk baxışda paytaxtdakı iqtisadi fəallığın, əmək bazarında canlanmanın və kadr tələbinin yüksəlməsinin göstəricisi kimi qiymətləndirilməlidir. Lakin əməkhaqqı artımının özü dövlət tərəfindən birbaşa tənzimlənən proses deyil. Bu dinamika əsasən işəgötürənlərin qərarları, əmək bazarında tələb–təklif balansı, kadr çatışmazlığı və ya bolluğu, eləcə də iqtisadi mühitdə baş verən dəyişikliklər fonunda formalaşır. Məhz bu amillərin təsirində yaranan ümumi mənzərə nəticəsində paytaxtda orta əməkhaqqı göstəriciləri yüksəlib.
Mövzu ilə bağlı iqtisadçı Eldəniz Əmirov Crossmedia.az-a açıqlama verib: "2025-ci ilin ilk doqquz ayına dair statistikaya əsasən, ölkə üzrə orta aylıq əməkhaqqı 9,5% artıb. Bakı şəhərində isə həmin dövr ərzində artım 8,6% təşkil edib. Bu göstəricilər onu deməyə əsas verir ki, regionlarda orta aylıq əməkhaqqının artım tempi paytaxtla müqayisədə daha yüksək olub. Əslində, bu, müsbət hal kimi qiymətləndirilə bilər. Məsələnin “bu artım nəyə əsasən tənzimlənir?” hissəsinə gəldikdə isə, qeyd etmək lazımdır ki, orta aylıq əməkhaqqı dövlət tərəfindən birbaşa tənzimlənmir və kimsə tərəfindən ayrıca təyin olunmur. Əməkhaqqının formalaşması işəgötürənlərin qərarları, iqtisadi proseslər, kadr çatışmazlığı və ya bolluğu kimi faktorlar, yəni ümumilikdə əmək bazarında tələb və təklif nisbəti əsasında müəyyənləşən dinamikaya bağlıdır. Elə orta aylıq əməkhaqqı göstəricisi də məhz bu real bazar kəsiyi üzrə hesablanır".
Ayhan
12:31 05.12.2025
Oxunuş sayı: 4943
