İşdən azad olma və məzuniyyət qaydaları dəyişilir: Detallar açıqlandı
Azərbaycanda əmək münasibətlərinin təkmilləşdirilməsi və işçilərin hüquqlarının qorunması sahəsində bir sıra islahatlar həyata keçirilir. Xüsusilə işçilərin işdən azad olunması qaydalarında aparılacaq yeniliklər bu sahədə mühüm əhəmiyyət kəsb edir. Təklif edilən dəyişikliklərə əsasən, işçinin əmək funksiyalarını yerinə yetirməsinə tibbi göstərişlərin əks olması, əməyin mühafizəsi üzrə təlim və biliyin yoxlanılmasından yayınması, habelə əmək vəzifələrinin pozulması hallarının araşdırılmasına maneçilik yaratması kimi səbəblər işdən azad olunma əsasları kimi nəzərdə tutulur. Eyni zamanda, işdən kənarlaşdırma müddəti və şərtləri hər bir konkret halın xüsusiyyətlərinə uyğun olaraq işəgötürən tərəfindən müəyyən ediləcək və istənilən halda qərarın ləğvi mümkündür. Bu dəyişikliklər işçi və işəgötürən arasında əmək münasibətlərinin şəffaflığının artırılmasına, hüquqların daha dəqiq tənzimlənməsinə xidmət edir.
Mövzu ilə bağlı hüquqşünas Əli Hüseynov Crossmedia.az-a bildirib ki, təqdim olunan Əmək Məcəlləsinə dəyişiklik layihəsi işçilərin hüquqlarını daha da gücləndirməyi hədəfləyir: "Dəyişikliyə əsasən, əmək məzuniyyətində olan işçilərin əməkhaqqı azaldıla bilməz. Bu, işçilərin sosial müdafiəsinin gücləndirilməsi baxımından mühüm addımdır. Əməkhaqqının sabit qalması işçilərin məzuniyyət zamanı maliyyə narahatlığını aradan qaldırır və onların istirahətə daha rahat çıxmasını təmin edir".
O qeyd edib ki, layihədə xüsusi xidmət sahələrində çalışan işçilər üçün məzuniyyət müddətinin 46 təqvim günündən az olmayacağı göstərilib: "Bu müddət işçilərin istirahət və bərpa üçün kifayət qədər vaxt qazanmalarını təmin edir. Uzun məzuniyyət işçilərin sağlamlığına və məhsuldarlığına müsbət təsir göstərir, motivasiyanı artırır. Eyni zamanda, işəgötürənlər üçün əlavə maliyyə yükü yarada bilər, çünki əməkhaqqının tam ödənilməsi və əlavə resursların cəlb olunması xərcləri artırır. Uzunmüddətli məzuniyyət işçilərin stress səviyyəsini azaldır, iş yerində məhsuldarlığı yüksəldir, iş qəzaları və xəstəlik hallarını azaldır. Bu isə işəgötürənlər üçün uzunmüddətli perspektivdə stabillik və etibarlı işçi qüvvəsi təmin edir. Ədalətli əmək münasibətləri işçilərlə işəgötürən arasında etimadı möhkəmləndirir, şirkət reputasiyasını yüksəldir".
Ekspertin fikrincə, məzuniyyət hüququnun qorunması gender bərabərliyinə də töhfə verir: "Xüsusi xidmət sahələrində çalışan qadın və kişilər üçün eyni şərtlərin tətbiqi ədaləti təmin edir. İşçilər öz hüquqlarının qorunduğunu gördükdə motivasiya və yaradıcılıq səviyyələri yüksəlir, rifahları isə birbaşa şirkət performansına təsir edir. Dəyişikliklər işçilərin peşəkar inkişafına da imkan yaradır. Uzun məzuniyyət yeni bilik və bacarıqlar qazanmaq üçün vaxt verir, karyera perspektivini artırır. Əməkhaqqının azaldılmaması maliyyə sabitliyini təmin edir, işçilərin iş yerinə sadiqliyini yüksəldir. Nəticədə həm işçilər, həm işəgötürənlər üçün balanslı və ədalətli əmək mühiti formalaşır".
Mehriban Yariyeva
11:55 05.12.2025
Oxunuş sayı: 5297
