Musiqili Teatrda Rumıniya Folklor Gecəsi keçirilib
Azərbaycan Dövlət Akademik Musiqili Teatrında Rumıniya Milli Günü münasibətilə "Ruminya Folklor Gecəsi" adlı konsert proqramı təşkil edilib. Tədbirdə Rumıniyanın Fokşani şəhərindən gələn "Tara Vrancei" Peşəkar Folklor Ansamblı Azərbaycanlı tamaşaçılara özünəməxsus rəqslər, milli geyimlər və ənənəvi rumın musiqi nümunələri təqdim edib.
Konsert öncəsi Rumıniyanın Azərbaycandakı səfiri Vasile Soare səhnəyə çıxaraq tamaşaçıları salamlayıb və iki ölkə arasında mövcud dostluq və mədəni əməkdaşlıq əlaqələrinin daim gücləndiyini vurğulayıb. O bildirib ki, Rumıniyanın Milli Gününün Azərbaycanda qeyd olunması xüsusi əhəmiyyət daşıyır və bu cür tədbirlər xalqlar arasında qarşılıqlı anlaşmanı daha da möhkəmləndirir. Səfir, həmçinin ansamblın ölkəmizin bir neçə şəhərində də çıxışlar planlaşdırdığını diqqətə çatdırıb.
Tədbirdə ansambl üzvləri Azərbaycan tamaşaçılarının göstərdiyi səmimi münasibətə görə məmnunluqlarını ifadə ediblər. Onların sözlərinə görə, ölkəmizdəki teatr mədəniyyəti, səhnə estetikası və tamaşaçı diqqəti rumıniyalı sənətçilərdə xüsusi təəssürat yaradıb. Bildirilib ki, Azərbaycanda böyük mədəni zənginlik, incəlik və sənətə yüksək hörmət hiss olunur və bu mühit hər bir ifaçını ruhlandırır.
Rumıniya folklor kollektivi proqram boyunca rəngarəng rəqslər, dinamik ritmlər və ənənəvi musiqi nümunələri ilə tamaşaçılara dolğun bir mədəniyyət təqdimatı yaşadıb. Ansamblın rəhbərliyi vurğulayıb ki, belə görüşlər Rumıniya ilə Azərbaycan arasındakı dostluq bağlarının daha da güclənməsinə mühüm töhfə verir. Ansamblın direktoru Marianna Murqoç bildirib ki, milli bayramlarını Azərbaycanda keçirmək böyük qürurdur.
Sonda teatr rəhbərliyinə göstərilən yüksək qonaqpərvərliyə görə təşəkkür edilib və mədəni əməkdaşlığın gələcəkdə də davam edəcəyi bildirilib.
Nigar Yahyazadə
14:42 03.12.2025
Oxunuş sayı: 745
