Bakıda ictimai iaşə dövriyyəsi 15% artıb
2025-ci ilin yanvar-oktyabr aylarında Bakı şəhərində ictimai iaşə dövriyyəsinin həcmi 2024-cü ilin müvafiq dövrü ilə müqayisədə real ifadədə 15 faiz artaraq 1 milyard 537.5 milyon manat olub.
Crossmedia.az Bakı Şəhər Statistika İdarəsinə istinadən xəbər verir ki, hüquqi şəxslər tərəfindən formalaşdırılan ictimai iaşə dövriyyəsi 842.7 milyon manat təşkil edib və bu, ümumi dövriyyənin 54.8 faizinə bərabərdir.
Həmin dövrdə Bakı şəhərində pərakəndə ticarət dövriyyəsinin həcmi əvvəlki ilin yanvar-oktyabr ayları ilə müqayisədə 4.7 faiz artaraq 31 milyard 31.3 milyon manat təşkil edib. Ticarət şəbəkəsində satılmış ərzaq məhsulları, içkilər və tütün məmulatlarının dəyəri 0.6 faiz artaraq 17 milyard 208.4 milyon manata, qeyri-ərzaq mallarının dəyəri isə 10.1 faiz artaraq 13 milyard 822.9 milyon manata yüksəlib. Pərakəndə ticarət dövriyyəsi real ifadədə müəssisələr üzrə 6.2 faiz, fərdi sahibkarlar, bazar və yarmarkalar üzrə isə 3.9 faiz artım nümayiş etdirib. Paytaxtda istehlak məhsullarının 36.9 faizi hüquqi şəxs statuslu müəssisələrdə, 51.5 faizi fərdi sahibkarlara məxsus ticarət obyektlərində, 11.6 faizi isə əmtəə bazarlarında satılıb.
Həmçinin Bakı şəhərində əhaliyə göstərilən ödənişli xidmətlərin ümumi dəyəri 2024-cü ilin eyni dövrü ilə müqayisədə real ifadədə 10.6 faiz artaraq 7 milyard 295.6 milyon manat təşkil edib və bu xidmətlərin 6 milyard 569.5 milyon manatı hüquqi şəxslər tərəfindən göstərilib ki, bu da xidmətlərin ümumi dəyərinin 90 faizini təşkil edir.
14:35 03.12.2025
Oxunuş sayı: 923
