“Orta Dəhliz” layihəsinin inkişafı üçün Birgə Təşəbbüs sənədi imzalanıb
Çin–Avropa Dəmir Yolu Ekspresinin II Beynəlxalq Əməkdaşlıq Forumu ("China–Europe Express Railway Cooperation Forum") çərçivəsində "Trans-Xəzər Beynəlxalq Nəqliyyat Marşrutunun ("Orta Dəhliz") yüksək keyfiyyətli inkişafı üzrə Birgə Təşəbbüs" sənədi imzalanıb.
Crossmedia.az bu barədə "Azərbaycan Dəmir Yolları" QSC-yə (ADY) istinadən xəbər verir.
Məlumata görə, qurumun sədr müavini Arif Ağayevin rəhbərlik etdiyi nümayəndə heyəti forumda iştirak edib. Forum Çin–Avropa marşrutu üzrə yükdaşımaların dayanıqlı inkişafına dəstək, Asiya və Avropa arasında nəqliyyat bağlantısının gücləndirilməsi, həmçinin "Kəmər və Yol" təşəbbüsünün inkişafı üçün əsas beynəlxalq müzakirə platformalarından biridir.
Tədbirdə çıxış edən A.Ağayev Azərbaycanın Çini təkcə strateji ticarət tərəfdaşı kimi deyil, həm də nəqliyyat və logistika sahəsində etibarlı müttəfiq kimi qiymətləndirdiyini bildirib. O, qeyd edib ki, infrastruktur və multimodal layihələrin birgə həyata keçirilməsi regionlararası əlaqələrin möhkəmlənməsi, logistika proseslərinin sürətlənməsi, marşrutların şaxələndirilməsi və iştirakçı ölkələrin ixrac-idxal potensialının artırılmasına mühüm töhfə verir.
Forumda iştirakla yanaşı, ADY nümayəndə heyəti Çinin "Cosco", "Huawei" və "CCCC" şirkətlərinin yüksək səviyyəli rəsmiləri ilə görüşlər keçirib, əməkdaşlıq perspektivlərini, regional yükdaşımalar və rəqəmsallaşma üçün atılacaq mümkün birgə tədbirləri müzakirə edib.
Tədbir çərçivəsində ümumi müzakirələr Çin–Avropa Dəmir Yolu Ekspresi dəhlizindən istifadə səmərəliliyinin artırılması, yükdaşıma həcminin genişləndirilməsi, müasir beynəlxalq logistika sisteminin formalaşdırılması, eləcə də Şərqlə Qərb arasında quru nəqliyyat əlaqələrinin təkmilləşdirilməsinə həsr olunub. İştirakçılar təhlükəsiz, dayanıqlı və rəqabətqabiliyyətli multimodal nəqliyyat marşrutlarının yaradılmasının "Kəmər və Yol" layihəsinin inkişafı üçün mühüm faktor olduğunu bildiriblər.
Forumun yekununda rəqəmsal məlumat mübadiləsi, tarif siyasətinin təkmilləşdirilməsi, infrastruktura investisiyaların artırılması, "yaşıl logistika" siyasətinin tətbiqi və s. istiqamətləri əhatə edən "Birgə Təşəbbüs" sənədi imzalanıb.
10:50 19.11.2025
Oxunuş sayı: 6782
