Paşinyan: 2026-cı il seçkiləri Ermənistanın sülhə və ya münaqişəyə yönünü müəyyən edəcək
Ermənistanın baş naziri Nikol Paşinyan 2026-cı ilin iyun ayında keçiriləcək növbəti parlament seçkilərinin ölkənin gələcəyi üçün həlledici əhəmiyyət daşıdığını bildirib. O, çıxışında qeyd edib ki, bu seçkilər təkcə siyasi qüvvələrin yarış meydanı deyil, həm də Ermənistan xalqının gələcək istiqamətini müəyyən edəcək əsas mərhələ olacaq.
Crossmedia.az xəbər verir ki, bunu bu gün Ermənistan parlamentində Nikol Paşinyan bildirib. Paşinyanın sözlərinə görə, seçkilər zamanı veriləcək qərar bir mühüm suala cavab olacaq – Ermənistan sülh yolunu seçəcək, yoxsa yenidən münaqişə və qarşıdurma məntiqinə qayıdacaq.
“İyunda keçiriləcək parlament seçkiləri bir əsas suala cavab verəcək. Ermənistan Respublikası xalqı öz seçimi ilə sülhə sadiqliyini təsdiqləməlidir. Əks halda, Ermənistan münaqişəyə və forpost məntiqinə sürüklənəcək”, – deyə o vurğulayıb.
Baş nazir əlavə edib ki, sülh və sabitlik seçimi ölkənin gələcək müstəqilliyi və suverenliyi üçün mühüm addımdır. “Xalq sülhə sadiqliyini təsdiqləməklə, eyni zamanda müstəqilliyin, suverenliyin və dövlətçiliyin yeni səviyyəsinə keçid qərarını da təsdiqləmiş olacaq”, – Paşinyan deyib.
Onun fikrincə, Ermənistan cəmiyyətinin qarşısında duran əsas vəzifə regionda uzunmüddətli sülhün bərqərar olunmasına və ölkənin daxili inkişafına yönəlmiş siyasəti dəstəkləməkdir. Paşinyan qeyd edib ki, yalnız bu halda Ermənistan “müharibə və forpost psixologiyasından” tamamilə uzaqlaşa, müstəqil və müasir dövlət kimi mövqeyini gücləndirə bilər.
Türkanə Məşədiyeva
12:40 27.10.2025
Oxunuş sayı: 1163
