Zaxarova Paşinyanın “erməni soyqırımı” ilə bağlı bəyanatına sərt reaksiya verib
Rusiya Xarici İşlər Nazirliyinin rəsmisi Mariya Zaharova Ermənistanın baş naziri Nikol Paşinyanın guya “erməni soyqırımı” ilə bağlı açıqlamasını sarsıdıcı adlandırıb.
“Tarixdə elə hallar olur ki, xalqlar, ölkələr sadəcə yoxa çıxırlar, çünki qarşılarına çıxan çağırışların öhdəsindən gələ bilmirlər. Çünki onlar üçün həqiqətən müqəddəs olmalı olan dəyərlərə xəyanət edirlər. Mənim üçün sadəcə sarsıdıcı oldu ki, guya toxunulmaz sayılan tarix və ona əsaslanan fəlsəfə – yəni erməni soyqırımı mövzusu – birdən-birə bir çox erməni dövlət xadimlərinin yozumunda sadəcə hansısa siyasi faktor kimi təqdim olunur. Onların sözlərinə görə, bu mövzudan imtina etmək belə mümkündür”.
Crossmedia.az xəbər verir ki, bu barədə Mariya Zaharova jurnalistlərə açıqlamasında bildirib.
Xatırladaq ki, yanvarda Sürixdə erməni icmasının nümayəndələri ilə görüş zamanı Paşinyan bildirmişdi ki, guya “erməni soyqırımı” tarixinin məsələsinə qayıtmaq, nə baş verdiyini və bunun niyə baş verdiyini anlamaq lazımdır. Daha sonra Paşinyan və Ermənistanın xarici işlər naziri Mirzoyan bəyan etmişdilər ki, Osmanlı imperiyasında “erməni soyqırımı”nın beynəlxalq səviyyədə tanınması Ermənistan üçün xarici siyasət prioriteti deyil, çünki onlar keçmişdən daha çox gələcəyi üstün tuturlar.
Fidan Quliyeva
23:58 24.10.2025
Oxunuş sayı: 989
