ABŞ-də şatdaun böhranı: “Bu həftə, ya da gələn həftə...”
ABŞ-da federal hökumətin bağlanması artıq reallığa çevrilib və bunun nəticəsi olaraq dövlət işçilərinin ixtisarına başlanıb. Ağ Ev və prezident Donald Trampın açıqlamalarına görə, bağlanma Demokrat Partiyasının mövqeyinə görə baş verib və administrasiya məsuliyyəti öz üzərinə almır. Oktyabrın 2-də Ağ Evin mətbuat katibi Karolayn Livitt də bağlanma zamanı minlərlə hökumət işçisinin işdən azad ediləcəyini təsdiqləyib. Bu vəziyyət ölkə iqtisadiyyatı və dövlət işçilərinin sosial vəziyyəti baxımından ciddi nəticələr doğura bilər.
Mövzu barədə Crossmedia.az-a danışan ReAl Partiyasının sədri, iqtisadçı Natiq Cəfərli bildirib ki, ABŞ-də şatdaun, yəni federal hökumət orqanlarının maliyyəsinin dayanması, indiyə qədər ən azı 10–15 dəfə baş verib: "Bu, tez-tez olur, yəni görünməmiş hadisə deyil. İndiki vəziyyətdən isə siyasi məqsədlər üçün istifadə etməyə çalışırlar. Respublikaçılar, yəni Trampın komandası, burada Demokratları günahlandırırlar. Günahı demokratların üzərinə yıxmaqla, onlar büdcə dəyişikliklərinə əleyhinə səs veriblər. Növbəti seçkilərdə demokratların tamamilə gözdən düşməsinə, yəni əhalinin və seçicilərin demokratları günahlandırmasına çalışırlar. Demokratlar isə əksinə düşünürlər və mesaj verməyə çalışırlar ki, respublikaçılar federal büdcəni normal idarə edə bilmir. Yəni bu, siyasi məsələdir. Ona görə də iqtisadi təsirləri o qədər də ciddi deyil. Düşünürəm ki, ya bu həftə, ya da gələn həftə artıq bu şatdaun məsələsi həllini tapacaq və federal hökumətin maliyyələşməsi bərpa olunacaq".
Mehriban Yariyeva
19:50 06.10.2025
Oxunuş sayı: 1713
