Cəmiyyətdə sahibkarlıq təşəbbüsü məktəbdən formalaşmalıdır- Təklif
Dünya iqtisadiyyatı və Azərbaycan (Layihənin müəllifi Rüfət Quliyevdir)
Son illər Azərbaycan təhsil sistemində həyata keçirilən islahatlar yalnız biliklərin ötürülməsi ilə məhdudlaşmır, həm də şagirdlərin gələcək həyat bacarıqlarının formalaşdırılmasına yönəlir. Təhsil naziri Emin Əmrullayevin “məktəblərdə sahibkarlığın tədris edilə bilməsi” ilə bağlı fikirləri bu baxımdan diqqətəlayiqdir. Bu ideya məktəblilərin sadəcə nəzəri biliklərlə deyil, həm də real iqtisadi prosesləri anlamaq, öz biznes ideyalarını inkişaf etdirmək və gələcəkdə uğurlu sahibkar kimi formalaşmaq imkanlarını genişləndirə bilər. Sahibkarlıq fənninin məktəblərə gətirilməsi həm milli iqtisadiyyatın güclənməsinə, həm də gənc nəsildə müstəqil düşüncə, təşəbbüskarlıq və yaradıcılıq kimi keyfiyyətlərin inkişafına ciddi töhfə verə bilər.
Mövzu ilə bağlı Milli Məclisin 4 çağırış deputatı, professor, iqtisad elmləri doktoru Rüfət Quliyev Crossmedia.az-a açıqlama verib:
“Cənab nazir təmamilə düz deyib. Onun mövqeyi şəxsən mənə alim kimi, vətəndaş kimi, sahibkar kimi yaxud da iqtisadiyyatın tədrisi ilə məşğul olan adam kimi çox xoşuma gəldi. Ona görə ki, artıq hər ölkədə kiçik və orta sahibkarların sayı artır. Əhalinin 5% dən 10% ə qədəri sahibkarlıq fəaliyyəti ilə məşğul ola bilər. Almaniyada bu gün işləyən insanların 99%-i kiçik və orta sahibkarlığın iştirakçılarıdır. Bu onu göstərir ki, həmin ölkə yüksək templə inkişaf edir. Təxminən buna oxşar rəqəmlər Avropanın digər aparıcı ölkələri olan Fransa, İtaliya, Belçika, Polşa da da müşahidə olunur. Həmçinin ABŞ-də də kifayət qədər insan bizneslə məşğuldur. Onlar həm sahibkar, həm də iştirakçılardır. Bu onu göstərir ki, cəmiyyətdə sahibkarlıq təşəbbüsü məktəbdən formalaşmalıdır. Bu qaçılmaz faktdır. Yeri gəlmişkən, deyim ki, mən ölkədə sahibkarlıq Universiteti yaxud İnsitutunun açılmasını təklif etmişəm. Bu ali məktəbin məzunları yeni ideyaları uğurla həyata keçirə biləcəklər. Sahibkarlar bütün təlimatlar, qanunlarla yaxından tanış olmalıdırlar. Təəssüf ki, bəzi sahibkarlar bunlardan xəbərsizdirlər. Onu da qeyd edim ki, səkkiz ildir "Sahibkar saatı" veriişini aparıram. DÜşünürəm ki, bu proqram da ölkədə sahibkarlığın inkişafına töhfə verir.
Professor qeyd edib ki, sahibkarlıq artıq ABŞ və İngiltərədə xüsusi Universitetlərdə fənn kimi tədris olunur: "Bunun cəmiyyətə və iqtisadiyyatın inkişafına böyük faydaları olacaq. Birmənalı qeyd etmək lazımdır ki, sahibkar adi insan deyil. Bu insan bəstəkar kimi, musiqiçi kimi, rəssam kimi xüsusi istedadlı olmalıdır. Hər bir insan sahibkar ola bilməz. Azərbaycanda kifayət qədər menecer və aparıcı mütəxəssislər formalaşıb. Amma sahibkarlığı menecerlikdən ayırmaq lazımdır. Və bu tədrisdən sonra məzunlar nəinki uğurlu nəzəri fikirləri müdafiə etməli, həm də bu nəzəri fikirləri həyata keçirməldirilər”.
Ayhan
12:05 01.10.2025
Oxunuş sayı: 3685
