Bloomberg: Rafael Qrossi BMT baş katibi olmaq üçün ABŞ-ın dəstəyinə ümid edir
Beynəlxalq Atom Enerjisi Agentliyinin (MAQATE) rəhbəri Rafael Qrossi BMT-nin baş katibi vəzifəsinə seçilmək üçün ABŞ administrasiyasının dəstəyini qazanmağa çalışır. Bu barədə Bloomberg agentliyi məlumat yayıb.
Crossmedia.az xarici KİV-ə istinadən xəbər verir ki, Qrossinin strategiyası ABŞ və onun müttəfiqlərinin dəstəyinə əsaslanır. Qeyd olunur ki, avqust ayında Qrossi Vaşinqtona səfər edərək, Amerikanın siyasi rəhbərliyinə baş katib postuna namizədliyini çatdırıb.
Agentliklə müsahibəsində Qrossi onun “ABŞ-ın namizədi” olması barədə iddiaları rədd edib. Onun sözlərinə görə, o, namizədliyi ilə bağlı yalnız ABŞ deyil, həm də Avropa İttifaqı, Hindistan, Yaponiya, Nigeriya və Pakistan rəsmiləri ilə müzakirələr aparıb:
“Mənim üçün əsas olan ümumi dəstəkdir”, – deyə o vurğulayıb.
Məlumatlara görə, Qrossi həmçinin Rusiya və Çinin də dəstəyini qazanmağa çalışır. Çünki BMT Təhlükəsizlik Şurasının bu iki daimi üzvünün veto hüququ onun seçilməsində həlledici ola bilər. Lakin bəzi mənbələr, xüsusilə braziliyalı rəsmilər hesab edirlər ki, ABŞ-ın açıq dəstəyi olacağı halda BRİKS ölkələri Qrossini dəstəkləməkdə maraqlı görünməyəcək.
Bloomberg yazır ki, BMT baş katibi postuna hazırda ən azı səkkiz potensial namizəd var. Onların arasında Latın Amerikasından olan qadın siyasətçilər də mövcuddur və Braziliya məhz bu namizədləri dəstəkləyir.
Xatırladaq ki, sentyabrın 23-də Rafael Qrossi Nyu-Yorkda BMT Baş Assambleyasının kənarında verdiyi müsahibədə baş katib postuna namizədliyini irəli sürəcəyini rəsmən açıqlamışdı.
18:06 24.09.2025
Oxunuş sayı: 1495
