Yaxın Şərq “od içindədir”: “Netanyahu hökuməti son hadisələrdən narahatdır, tez bir zamanda”…
İsrail Ordusunun 36-cı diviziyası iki həftəlik intensiv hazırlıqdan sonra “Gideon arabaları-2” əməliyyatı çərçivəsində Qəzza şəhərinə quru bölmələri yerləşdirməyə başlayıb. Müdafiə Ordusu bildirir ki, son günlər bölgədə onlarla hədəfə zərbə endirilib və əməliyyatlar davam edir.
İsrailin Qəzza zolağına quru bölmələri yerləşdirməsi vəziyyəti daha gərginləşdirə bilər. Bu addım həm hərbi, həm də humanitar baxımdan ciddi nəticələrə səbəb ola bilər. Əməliyyatın məqsədi təhlükəsizliyi təmin etmək olsa da, bölgədəki gərginliyi artırmaq riski yüksəkdir.
Mövzu ilə bağlı siyasi şərhçi Pərviz Mirizadə Crossmedia.az-a açıqlama verib.
P.Mirizadə Qəzza əməliyyatlarının daha da gərginləşdiyini və humanitar böhranın artdığını ildirib:
“Fələstin dövlətinin tanınması prosesinin aktual olduğu bir zamanda İsrailin Qəzzaya quru qoşunlarının bölmələrini yerləşdirməsi regiondakı mürəkkəb geosiyasi vəziyyəti daha da gərginləşdirəcək. Görünür, Benyamin Netanyahu hökuməti son hadisələrdən narahatdır və tez bir zamanda hədəflərinə nail olmaq üçün intensivliyi artırır. Çünki, İsrail bütün parametrlər üzrə güclü tərəf olsa da, hələ də Qəzza zolağında istənilən nəticəni əldə edə bilmir.
Növbəti quru əməliyyatları ilk növbədə hər iki tərəfin itkilərinin çoxalmasına zəmin yaradacaq. Çünki Qəzzadakı sıx məskunlaşma və HƏMAS- ın tunel sistemləri çərçivəsində həyata keçirdiyi partizan döyüşləri "Saxal" ın işini çətinləşdirən əsas faktordur.
Bununla yanaşı, hərbi əməliyyatların intensivləşməsi anklavdakı humanitar böhranın daha da dərinləşməsinə səbəb olacaq. Nəticədə humanitar böhran fonunda İsrailə qarşı ictimai təzyiq ara bilər”.
O bildirib ki, Netanyahu hökuməti Qətərə endirilən zərbələr fonunda son dövrlər olduqca ciddi səhvlərə yol verir və məlum ritorika region ölkələrinin İsrailə qarşı bir cəbhədə yer almasını şərtləndirir: “Bu isə Təl-Əvivin əsas dəstəkçisi olan ABŞ-nin mövqelərinin zəifləməsinə zəmin yaradır. Çünki Səudiyyə Ərəbistanı, Birləşmiş Ərəb Əmirlikləri, Qətər və digər ərəb dövlətləri milyardlarla dollar ödəyərək öz təhlükəsizliklərini ABŞ-yə həvalə etmişdilər və indi qeyd etdiyim ölkələr alternativ variantlar axtarışındadır. Bu da öz növbəsində Vaşinqtonun milyardlarla dollarlıq gəlirdən məhrum olması deməkdir. Prinsip etibarilə, Təl-Əvivin hərbi kompaniyası regionda diplomatik proseslərə mənfi təsir göstərəcək, humanitar böhranı daha da dərinləşdirəcək və eskalasiyanı artıracaq”.
Nicat Rüstəmzadə
22:09 22.09.2025
Oxunuş sayı: 1717
