Suriya ilə İsrail arasında sülh imzalana bilər- Proqnoz
İsrailin Baş naziri Binyamin Netanyahu Suriya ilə aparılan danışıqlarda müəyyən irəliləyiş əldə olunduğunu açıqlayıb. O, Nazirlər Kabinetinin iclasında bu prosesin gələcəkdə sülh sazişinə gətirib çıxara biləcəyini bildirib.
Netanyahunun
açıqlaması İsrail və Suriya münasibətlərində yeni mərhələnin başlaya biləcəyini
göstərir. Lakin tərəflərin qarşılıqlı tələbləri prosesin gələcəyini hələ də
qeyri-müəyyən saxlayır. Bu səbəbdən əldə
olunan irəliləyişin real sülh sazişinə çevrilib-çevrilməyəcəyi zamanla bəlli
olacaq.
Baş nazirin səsləndirdiyi fikirlər barədə Orta Doğu Araşdırmalar Mərkəzinin sədri, politoloq Sədrəddin Soltan Crossmedia.az-a açıqlama verib.
O,
sanksiyaların aradan qaldırılmasının İsrail ilə Suriya sülhünə yol aça biləcəyini
bildirib:
“Suriya
Prezidenti Əhməd Əş-Şaraanın başçılıq etdiyi Suriya nümayəndə heyəti BMT Baş
Assambleyasının sessiyasında iştirak etmək üçün Nyu-Yorka səfər edir. Bu, tarixi
hadisə hesab olunur. Çünki 58 ildən sonra Suriyanın dövlət başçısı ABŞ-a səfər
edir. Bu addım həm İsrail-Suriya, həm də ABŞ-Suriya münasibətləri baxımından
mühüm əhəmiyyət daşıyır.
Əş-Şaraa bildirir ki, Suriya ilə ABŞ arasında münasibətlərin normallaşması mümkündür və
Vaşinqton Suriyaya tətbiq etdiyi sanksiyaları aradan qaldırmalıdır. Bu, həm
Suriyanın mövcud hakimiyyətinin tanınması, həm də yardım jesti kimi qəbul edilə
bilər. Belə bir proses gələcəkdə İsrail-Suriya münasibətlərinə də təkan verə bilər.
Odur ki, perspektivdə İsrailin Suriya ilə sülh sazişi imzalaması ehtimalı
mövcuddur”.
O qeyd edib ki, Suriya daxilində milli birlik məsələsi də vacibdir: “Xüsusilə PKK terror təşkilatının qolu sayılan Suriya Demokratik Qüvvələrinin ölkənin güc strukturlarına inteqrasiya olunması önəm kəsb edir. Druz icması ilə bağlı İsrail və Suriya arasında anlaşma mümkündür, lakin Suriya Demokratik Qüvvələri ilə bağlı məsələ daha mürəkkəb olaraq qalır. Bu həm də Suriyanın ərazi bütövlüyü və xarici təhdidlərlə əlaqədardır. Gözlənilir ki, ABŞ səfəri çərçivəsində Əhməd Əş-Şaraanın xüsusi diqqət ayıracağı mövzulardan biri də məhz Suriya Demokratik Qüvvələri olacaq. ABŞ-Suriya münasibətləri normallaşdıqca və gücləndikcə, İsrail-Suriya əlaqələrinin də normallaşması və nəticədə sülh sazişinin imzalanması mümkün ola bilər”.
21:59 22.09.2025
Oxunuş sayı: 8336
