Üzeyir Hacıbəyli XVII Beynəlxalq Musiqi Festivalı çərçivəsində "Şah İsmayıl" operası nümayiş olunub
Sentyabrın 20-də Azərbaycan Dövlət Akademik Opera və Balet Teatrının təqdimatında “Şah İsmayıl” operası nümayiş olunub.
Crossmedia.az xəbər verir ki, Azərbaycan Dövlət Akademik Musiqili Teatrında Üzeyir Hacıbəyli XVII Beynəlxalq Musiqi Festivalı çərçivəsində təqdim olunan opera Müslüm Maqomayevin 140 illiyinə həsr olunub.
Əsərin süjeti, Şah İsmayılın taxt-tac uğrunda mübarizəsini və onun Gülzar adlı gözəl bir qıza olan məhəbbətini əks etdirir. Opera üç pərdədən ibarət olub. Hər pərdədə müxtəlif hadisələr və xarakterlər ön plana çıxır.
Tamaşanın quruluşçu rejissoru Xalq artisti Ağababa Bünyatzadə, rejissoru Əməkdar incəsənət xadimi Hafiz Quliyev, dirijoru Əməkdar incəsənət xadimi Sevil Hacıyeva, quruluşçu rəssamı Əməkdar rəssam Ənvər Almaszadə, baletmeysteri SSRİ Xalq artisti, Dövlət mükafatı laureatı Qəmər Almaszadə və solo tarda Əməkdar artist Elxan Mansurovdur.
Rolları Əməkdar artist Təyyar Bayramov (Şah İsmayıl), Taleh Yahyayev (Aslan şah), Əməkdar artist Fəridə Məmmədova (Gülzar), Aytən Məhərrəmova (Ərəbzəngi), Əməkdar artist Ağasıyev Tural (İbn Tahir), Fəhmin Əhmədli (Vəzir), Əməkdar artist İbrahimov Əliəhməd (Əbu Həmzə), Nəzər Bəylərov (Rəmmal), Mütəllim Dəmirov (Çapqınçı), Mirəli Sarızadə (Züvvar) və Nazim Mahmudov (Qoca Ərəb) ifa ediblər.
“Şah İsmayıl” operası ilk dəfə səhnəyə 1919-cu ildə qoyulub. Tarixi-əfsanəvi mövzuda yazılmış operanın libretto müəllifi Mirzə Qədir İsmayılovdur. İlk tamaşada orkestri bəstəkarın özü - Müslüm Maqomayev idarə edib.
Qeyd edək ki, Heydər Əliyev Fondu və Mədəniyyət Nazirliyinin təşkilatçılığı ilə sentyabrın 18-dən 28-dək Üzeyir Hacıbəyli XVII Beynəlxalq Musiqi Festivalı keçirilir. Bu münasibətlə ölkənin müxtəlif şəhərlərində konsertlər, tamaşalar və konfranslar təşkil olunur.
21:15 20.09.2025
Oxunuş sayı: 6389
