Serbiyada dahi bəstəkar Üzeyir Hacıbəylinin xatirəsi anılıb
Azərbaycan musiqi mədəniyyətinin qurucusu, dahi bəstəkar Üzeyir Hacıbəylinin anadan olmasının 140 illiyi və Milli Musiqi Günü münasibətilə onun Serbiyanın Novi Sad şəhərində ucaldılmış büstü önündə tədbir keçirilib.
Crossmedia.az xəbər verir ki, Azərbaycanın Serbiyadakı səfirliyinin əməkdaşlarının iştirak etdiyi tədbirdə dahi bəstəkarın xatirəsi bir dəqiqəlik sükutla yad edilib, büstü önünə əklil qoyulub.
Mərasimdə çıxış edən Azərbaycanın Serbiyadakı səfiri Kamil Xasiyev milli bəstəkarlıq məktəbinin, ilk milli opera və operettanın yaradıcısı, musiqişünas, publisist, dramaturq və pedaqoq, Azərbaycanın və SSRİ-nin Xalq artisti, akademik Üzeyir Hacıbəylinin Azərbaycan klassik musiqi tarixi və mədəniyyətində müstəsna xidmətlərindən bəhs edib. K.Xasiyev Azərbaycan Prezidenti İlham Əliyevin dahi bəstəkar Üzeyir Hacıbəylinin 140 illiyinin qeyd edilməsi haqqında Sərəncam imzaladığını vurğulayıb.
Səfir 1995-ci ildə Ümummilli Lider Heydər Əliyevin Fərmanı ilə Üzeyir Hacıbəylinin 110 illik yubileyi ərəfəsində 18 sentyabrın Milli Musiqi Günü kimi qeyd olunması qərarını xatırladıb. 2009-cu ildə Heydər Əliyev Fondu və Mədəniyyət Nazirliyi tərəfindən Üzeyir Hacıbəylinin adı verilən Beynəlxalq Musiqi Festivalının əsasının qoyulduğu diqqətə çatdırılıb.
21:44 18.09.2025
Oxunuş sayı: 5747
