Üzeyir Hacıbəylinin yubileyi Vyanadakı abidəsi önündə qeyd edilib
18 Sentyabr - Milli Musiqi Günü və dahi bəstəkar Üzeyir Hacıbəylinin anadan olmasının 140 illik yubileyi münasibətilə Azərbaycanın Avstriyadakı səfirliyi və bu ölkədəki Mədəniyyət Mərkəzinin təşkilatçılığı ilə bəstəkarın Vyanada ucaldılmış abidəsi önündə musiqili-bədii proqram təşkil olunub.
Crossmedia.az xəbər verir ki, Vyanadakı Dunay Parkında yerləşən abidənin qarşısında keçirilən xatirə tədbirində Avstriyanın dövlət rəsmiləri, Vyanada akkreditə olunmuş diplomatik korpusun və beynəlxalq təşkilatların təmsilçiləri, bu ölkədə yaşayan həmvətənlərimiz iştirak ediblər.
Azərbaycanın Avstriyadakı səfiri Rövşən Sadıqbəyli çıxışında Ü.Hacıbəylinin Azərbaycan milli musiqi mədəniyyətindəki transformativ rolundan, eləcə də çoxşaxəli ictimai fəaliyyətindən bəhs edib. Səfir tədbirdə BMT Baş katibinin müavini, Narkotiklər və Cinayətkarlıq üzrə İdarəsinin (BMTNCİ) icraçı direktoru Qada Valinin iştirakını yüksək qiymətləndirib. Qeyd olunub ki, xanım Valinin təkcə siyasi görüş və konfranslarda deyil, eləcə də mədəniyyətimiz üçün önəmli günlərdən birində iştirak etməsi qürurvericidir.
Çıxışında Qada Vali tədbirə olduqca böyük maraqla qatıldığını, çox sevdiyi “Leyli və Məcnun” dastan-rəvayəti əsasında yazılan müsəlman Şərqinin ilk operası “Leyli və Məcnun” əsərini qeyd edib.
Daha sonra Vyana Şəhər Parlamentinin və Bələdiyyə Şurasının üzvü Aslıhan Bozatemur Vyana şəhərinin meri və qubernatoru Mixael Ludviq adından çıxış edib. A. Bozatemur abidənin klassik musiqinin beşiyi sayılan Vyana şəhərinin ən gözəl məkanlarından birində ucaldılmasından və bunun olduqca simvolik məna kəsb etdiyindən bəhs edib.
Azərbaycanın Avstriyadakı səfirliyinin təşəbbüsü ilə 2006-cı ildə ucaldılan abidənin açılışında çıxış edən uşaqlardan ibarət “Qarabağ bülbülləri” xoru xüsusi qeyd olunub.
Azərbaycanın Avstriyadakı Mədəniyyət Mərkəzinin direktor müavini Elgün Niftəli çıxışında Azərbaycan musiqisində və mədəniyyətində bir çox ilk nailiyyətlərin - ilk musiqi dərsliyi, ilk musiqili tamaşa, ilk opera, ilk operetta və ilk konservatoriyanın yaradılmasının məhz Üzeyir Hacıbəylinin adıyla bağlı olduğunu qeyd edib. O, bu il həm də bəstəkarın yaxın dostu və qohumu, Azərbaycanın ilk peşəkar dirijoru və bəstəkarı Müslüm Maqomayevin 140 illiyi qeyd olunduğunu vurğulayıb. Qeyd olunub ki, Ü. Hacıbəylinin yubiley ili çərçivəsində “Arşın mal alan”ın alman dilinə tərcümə olunmuş “Samt und Seide” (“Məxmər və İpək”) adı altında yeni quruluşda təqdim olunacaq və tamaşalar 30 və 31 oktyabr, həmçinin 2 noyabr tarixlərində “Akzent” teatrında baş tutacaqdır.
Çıxışlardan sonra tədbirin musiqili hissəsində Fərid Feyzullayev (violin) və Rodrigo Sámano (violonçel) Üzeyir Hacıbəyli, Müslüm Maqomayev, Handel və Halvorsen kimi bəstəkarların əsərlərini ifa ediblər.
18:07 18.09.2025
Oxunuş sayı: 3909
