Azərbaycan və Almaniya arasında ilk yarım il ərzində birbaşa xarici investisiyaların həcmi açıqlanıb
Cari ilin ilk 6 ayı ərzində Almaniyadan Azərbaycanın iqtisadiyyatına birbaşa xarici investisiyaların həcmi 17,029 milyon ABŞ dolları təşkil edib.
Crossmedia.az xəbər verir ki, bu barədə Azərbaycan Mərkəzi Bankından bildiriblər.
Məlumatlara görə, bu göstərici keçən ilin eyni dövrü ilə müqayisədə 27,1 milyon ABŞ dolları və ya 61,4% azdır.
Hesabat ilində Almaniyadan gələn investisiyaların Azərbaycanın ümumi birbaşa xarici investisiyalarındakı payı 0,5% təşkil edib.
Öz növbəsində, cari ilin ilk 6 ayında Azərbaycan Almaniyanın iqtisadiyyatına 14 milyon ABŞ dolları sərmayə qoyub ki, bu da keçən ilin eyni dövrü ilə müqayisədə 602 min ABŞ dolları və ya 4,1% azdır.
Azərbaycanın Almaniyaya investisiyalarının ümumi birbaşa xarici investisiyalardakı xüsusi çəkisi 1% təşkil edib. Beləliklə, Almaniya Azərbaycan üçün ən çox investisiya yatırdığı ölkələr arasında 11-ci yerdə qərarlaşıb.
2024-cü ilin ilk 6 ayında Almaniyadan Azərbaycana birbaşa xarici investisiyaların həcmi 44,2 milyon ABŞ dolları, Azərbaycandan bu ölkəyə investisiyaların həcmi isə 14,575 milyon ABŞ dolları olub.
Cari ilin ilk 6 ayında Azərbaycanın iqtisadiyyatına birbaşa xarici investisiyaların həcmi 3,222 milyard ABŞ dollarını ötüb ki, bu da 2024-cü ilin eyni dövrü ilə müqayisədə 244,3 milyon ABŞ dolları və ya 8,2% çoxdur.
Bununla yanaşı, hesabat dövründə Azərbaycanın xarici iqtisadiyyata yönəltdiyi birbaşa xarici investisiyaların həcmi 1,350 milyard ABŞ dolları təşkil edib ki, bu da 2024-cü ilin ilk 6 ayı ilə müqayisədə 351,561 milyon ABŞ dolları və ya 35,2% çoxdur.
12:36 18.09.2025
Oxunuş sayı: 1026
