İran rəhbərliyinin sərt bəyanatları daxili auditoriyaya hesablanmış addımlardır - Partiya sədri
İran prezidenti Məsud Pezeşkianın son açıqlaması Yaxın Şərqdə gərginliyi daha da artırıb. O, İsrail dövlətini “Sionist rejim” adlandıraraq İslam dünyasına çağırış edib ki, bu rejimlə bütün diplomatik, siyasi və iqtisadi münasibətlər tamamilə dayandırılsın. Pezeşkianın sözləri regiondakı mövcud qarşıdurmalar fonunda diqqət çəkir və Tehran rəhbərliyinin İsrailə qarşı sərt mövqeyini bir daha ortaya qoyur.
Mövzu ilə bağlı Crossmedia.az-a Azad Vətən Partiyasının sədri Akif Nağı açıqlama verib:
"Təbii ki, İranın Fələstin və İsraillə bağlı siyasəti reallıqdan uzaqdır. Uzun illərdir ki, guya Fələstini müdafiə edən İran əslində ciddi addımlar atmır. İsrailə qarşı düşmən ritorikası nümayiş olunsa da, praktikada müqavimət göstərilmir. Əvvəlki mərhələlərdə bu rejim yarananda əsas hədəf SSRİ və ABŞ idi. Onlara qarşı “böyük şeytan, kiçik şeytan” ifadələrindən istifadə olunurdu və guya hər ikisinə qarşı mübarizə aparılırdı. Lakin sonradan bu ritorika unuduldu, İsrail mövzusu ön plana çəkildi və “əsas düşmən” kimi təqdim olundu. Halbuki İsrail dövlətini tanımamaq, Fələstini müdafiə adı altında bu cür mövqe ortaya qoymaq qətiyyən düzgün deyil".
Akif Nağı qeyd edib ki, reallıq isə ondan ibarətdir ki, İsrailin dövlət olaraq mövcudluğu qəbul olunmalıdır: "BMT-nin bəyannaməsi ilə dünyanın 140-dan artıq dövləti İsraili tanıyıb. Bu şəraitdə İranın “İslam dünyası İsraillə bütün münasibətləri dayandırmalıdır” çağırışı əsassız görünür. Çünki İslam dünyasında vahid mövqedən söhbət gedə bilməz – hər bir dövlətin öz maraqları var və bu maraqlar əsasında siyasət yürüdülür.
Azərbaycanın mövqeyi bu məsələdə obyektiv hesab olunur. Bakı real vəziyyəti nəzərə alaraq balanslı siyasət yürüdür, beynəlxalq tədbirlərdə də bu mövqeyini qoruyur. Məsələn, Dohada keçirilən konfransda Azərbaycanın xarici işlər naziri iştirak edib və ölkə İslam həmrəyliyini dəstəkləyən qətnaməyə səs verib".
Partiya sədri həmçinin vurğulayıb ki, beləliklə, İranın mövqeyi daha çox ritorika xarakteri daşıyır və real siyasətə çevrilə bilmir: "Çünki dövlət maraqları, beynəlxalq hüquq və mövcud siyasi reallıqlar nəzərə alındıqda bu cür çağırışların praktik nəticəsi yoxdur. İran rəhbərliyinin sərt bəyanatları isə daha çox daxili auditoriyaya hesablanmış addımlar təsiri bağışlayır".
Xumar Emilqızı
22:17 15.09.2025
Oxunuş sayı: 5407
