Azərbaycanın İsraillə yanaşı münasibətlərinin çox yaxşı olduğu ərəb dövlətləri var - AÇIQLAMA
Azərbaycan Respublikası müstəqilliyini bərpa edəndən dünyada balanslı siyasət yürüdür, münaqişələrdən imtina edir, sülh və əmin-amanlığın yaradılması üçün vasitəçilik edir. Məhz bu obyektiv mövqe, iqtisadi güc Azərbaycana xeyli dost qazandırıb. Bu dostlar arasında fikirləri və maraqları ayrı olan, hətta münaqişə vəziyyətində olan dövlətlər də var. Məsələn Rusiya-Ukrayna, İsrail-Fələstin, Suriya-İsrail, İran-İsrail. Bu münaqişə şəraitində olan dövlətlərin hər biri ilə Azərbaycanın normal münasibətləri olub və var. Məsələn ötən gün BMT Baş Assambleyasının 142 lehinə, 10 əleyhinə səslə Fələstinin 1967-ci il sərhədlərində dövlət kimi tanınmasını dəstəkləyən “Nyu-York Bəyannaməsi”ni qəbul etməsi və Azərbaycan Fələstinin lehinə səs verməsi buna bariz nümunədir. Lakin bu balanslı siyasəti və normal münasibətlərdən münaqişə yaratmaq istəyən tərəflər də çoxdur. Müxtəlif qruplaşmalar var ki, balanslı siyasətimizi qərəzli və tərəfli göstərməyə çalışır.
Mövzu ilə bağlı politoloq Rufiz Hafizoğlu Crossmedia.az-a açıqlama verib: “Azərbaycan-İsrail dövlətləri arasında olduqca güclü münasibətlər var. Lakin bu münasibətlərdən danışarkən təəssüflər olsun ki, İsrail, eləcə də bu münasibətlərin inkişaf etməsini istəməyən qüvvələr tərəfindən çox spekulyativ açıqlamaların şahidi oluruq. Problem ondan ibarətdir ki, İsrailpərəst qüvvələr və İsrail mediası iddia edir ki, Azərbaycan yalnız İsrailin dostudur, onun müsəlman dünyası ilə heç bir əlaqəsi yoxdur. Məhz elə İsrail üçün özünü fəda etməyə hazırdır. Bu olduqca spekulyativ və təhlükəli yanaşmadır. İkinci bir təhlükə odur ki, Azərbaycan-İsrail münasibətlərini əllərində bayraq edərək bizi islam dünyasından qoparmağa çalışan, “Azərbaycan sionist rejimə qurban oldu” iddialarını gündəmə gətirən bəzi İranpərəst qruplar və media qurumları var. Azərbaycanın İsrail ilə münasibətləri onun ərəb dünyası ilə münasibətlərini inkişaf etdirməsinə heç bir halda əngəl deyil. Niyə deyil? Çünki bizim buna yetərincə adekvat, dolğun və məntiqli cavabımız var. Azərbaycan ərəb dünyası ilə yanaşı İsrail ilə də münasibətlərini gücləndirir”.
Politoloq həmçinin qeyd edib: “Azərbaycanın İsraillə yanaşı münasibətlərinin çox yaxşı olduğu ərəb dövlətləri var. Məsələn Misir, İordaniya, Mərakeş, Birləşmiş Ərəb Əmirlikləri. Bütün bunların fonunda davamlı olaraq Azərbaycana hücumlar etmək, ittiham etmək düzgün deyil. Onu da qeyd edim ki, bütün bunlarla yanaşı Azərbaycan İslam Əməkdaşlıq Təşkilatının ən aktiv üzvlərindən biridir. Bu gün Azərbaycanda Fələstin səfirliyi var. Fələstin səfirliyinin Azərbaycanda olması onsuz da Azərbaycanın Fələstini dövlət kimi tanımasının simasıdır. Bu baxımdan İsrail incisə də, etiraz etsə də Azərbaycan İƏT-in üzvüdür və İƏT-in məqsədi də Fələstin dövlətinin tanıdılmasıdır. O baxımdan Azərbaycanın müstəqil Fələstin dövlətinin yaranmasına səs verməsi hər hansı fəsad törədə bilməz”.
Ayhan
18:12 15.09.2025
Oxunuş sayı: 6335
