BMT Təhlükəsizlik Şurası Qətərdə HƏMAS-a edilən hava zərbəsini müzakirə edəcək
BMT Təhlükəsizlik Şurası sentyabrın 10-da, çərşənbə günü İsrailin Qətərin paytaxtı Dohada HƏMAS nümayəndələrinə qarşı həyata keçirdiyi hava hücumu ilə bağlı fövqəladə iclas keçirəcək. Məlumata görə, bu iclas Əlcəzairin tələbi ilə çağırılıb.
Crossmedia.az xarici mediaya istinadən bildirir ki, hadisə sentyabrın 9-da baş verib. İsrailin hücumu nəticəsində HƏMAS-ın beş üzvü həyatını itirib. HƏMAS rəsmi açıqlama yayaraq İsrailin təşkilatın danışıqlar qrupunun üzvlərini zərərsizləşdirmək cəhdinin uğursuzluğa düçar olduğunu bəyan edib.
Məlumata görə, ölənlər arasında HƏMAS-ın Qəzzadakı lideri və danışıqlar qrupunun rəhbəri Xalil əl-Hayyanın oğlu – İmam Xalil əl-Hayya da var. Həmçinin, Xalil əl-Hayyanın ofisinin rəhbəri Cihad Luvad və onları müşayiət edən Abdulla Əbd əl-Vahid, Muamman Xasuna və Əhməd Əbd əl-Malik də zərbə nəticəsində həlak olub.
Hadisə beynəlxalq aləmdə geniş rezonans doğurub və İsrailin bu addımı regionda gərginliyi daha da artırıb. İndi diqqətlər BMT Təhlükəsizlik Şurasının keçiriləcək iclasına yönəlib.
19:26 10.09.2025
Oxunuş sayı: 635
