İnsanların çox kredit götürməsi pulu dəyərdən sala bilər - Ekspert
Azərbaycanda əhalinin bank kreditlərinə marağı son illərdə maliyyə bazarının əsas göstəricilərindən birinə çevrilib. Kredit portfelinin həcminin artması və xüsusilə istehlak kreditlərinə tələbin yüksək olaraq qalması əhalinin gündəlik xərclərini maliyyələşdirmək üçün borclanma imkanlarından daha çox istifadə etdiyini göstərir.
Bu tendensiya yalnız bank sektorundakı aktivliyi deyil, əhalinin gəlir, istehlak və borclanma davranışındakı dəyişiklikləri də gündəmə gətirir. Kreditlərə tələbin artması fonunda borclanmanın maliyyə imkanlarına uyğunlaşdırılması və ödəniş qabiliyyətinin nəzərə alınması isə həm vətəndaşlar, həm də maliyyə sektoru üçün mühüm məsələlərdən biri olaraq qalır.
Crossmedia.az-a açıqlamasında sosioloq Əhməd Rəhmanov insanların kreditə meyilliliyinin istehlak asılılığı ilə əlaqəli olduğunu bildirib:
“Çox təəssüf ki, insanların kreditə meyilliliyi bir növ psixoloji problemdir. Çünki insanlarda istehlak asılılığı yaranıb və bu, çox insanda var. İnsanlar lazım olmayan xərclərə yol verirlər. İnanırlar ki, kredit var, ödəyəcəyəm, edəcəyəm. Bu kredit insanların, xüsusilə iradəsi zəif olanların kreditə meyilliliyini daha da artırır”.
Sosioloq qeyd edib ki, bəzi insanlar ehtiyacları olmadığı halda belə bahalı məhsulları kreditlə əldə etməyə üstünlük verirlər: “Bu yaxınlarda bir ailə ilə tanış oldum. Atası təqaüdçüdür və güclə dolanırlar, amma qızı gedib kreditlə bahalı telefon alıb. Halbuki prinsip etibarilə onun həmin telefona ehtiyacı yoxdur”.
Əhməd Rəhmanovun sözlərinə görə, bu cür istehlak davranışı gələcəkdə sosial narazılıqlara da səbəb ola bilər: “Azərbaycan kimi ölkələrdə gələcəkdə pulun dəyərinin düşməsi və ya insanların maliyyə imkanlarının azalması nəticəsində narazılıq yarana bilər. Çox təəssüf ki, insanlar bu narazılıqlarını dövlətə yönəldirlər və deyirlər ki, dövlət baxmır. Amma burada dövlətin heç bir günahı yoxdur. Bu insanlar sadəcə olaraq istehlakçı bumuna düşüblər”.
Nigar Xəlilli
18:15 08.10.2026
Oxunuş sayı: 57
