Tramp süni intellektin qlobal səviyyədə tənzimlənməsinə qarşı çıxıb
ABŞ Prezidenti Donald Tramp süni intellektin inkişafına beynəlxalq səviyyədə məhdudiyyətlər qoyulmasına qarşı olduqlarını bəyan edib.
Crossmedia.az xəbər verir ki, Tramp bu barədə Çinin Şençjen şəhərində keçirilən Asiya-Sakit Okean İqtisadi Əməkdaşlıq Təşkilatının (APEC) 33-cü İqtisadi Liderlər Görüşündə çıxışı zamanı danışıb.
O bildirib ki, ABŞ süni intellektə nəzarət etmək və onun inkişafını məhdudlaşdırmaq məqsədi daşıyan istənilən qlobal tənzimləmə təşəbbüsünə qarşıdır.
“Biz süni intellekti nəzarət altına almaq və ya inkişafına mane olmaq məqsədi daşıyan qlobal tənzimləmənin istənilən formasına qarşıyıq və buna imkan verməyəcəyik”, – Tramp vurğulayıb.
ABŞ lideri süni intellekti Sənaye İnqilabından sonra ən böyük texnoloji transformasiya adlandıraraq, ölkəsinin bu sahədə dünya lideri olduğunu qeyd edib.
Bununla yanaşı, Tramp süni intellektin müəyyən risklər daşıdığını da etiraf edib. Onun sözlərinə görə, texnologiyanın mənfi tərəflərinə diqqətlə yanaşmaq və onları düzgün idarə etmək lazımdır.
Tramp çıxışı zamanı ABŞ iqtisadiyyatından və ölkənin enerji ixracı imkanlarından da danışıb. O, Alyaskada mayeləşdirilmiş təbii qazın Asiyaya nəqlini nəzərdə tutan boru kəməri layihəsinin təsdiqləndiyini bildirib. Həmçinin ABŞ neft şirkətlərinin Venesuelada fəaliyyətini genişləndirdiyini qeyd edib.
ABŞ Prezidenti çıxışında Çin lideri Si Cinpin və Rusiya Prezidenti Vladimir Putinlə keçirilməsi planlaşdırılan üçtərəfli görüşü də “tarixi görüş” adlandırıb. O, tərəflərin qarşılıqlı əməkdaşlıq imkanlarını müzakirə edəcəyini bildirib.
22:45 22.11.2026
Oxunuş sayı: 43