Ərdoğan: Zəngəzur dəhlizi məsələsində hər hansı bir problem, fikir ayrılığı yoxdur
Zəngəzur dəhlizi məsələsində hər hansı bir problem, fikir ayrılığı yoxdur.
Crossmedia.az xəbər verir ki, bunu Türkiyə Prezidenti Rəcəb Tayyib Ərdoğan Çin səfərindən qayıdarkən jurnalistlərə açıqlamasında deyib.
"İlham Əliyevlə ikitərəfli görüşümüz zamanı mən bu ümidləri onun gözlərində gördüm. Ağ Evdəki imzalar əlbəttə ki, Ermənistan və Azərbaycan arasında münasibətlərin normallaşması prosesini sürətləndirdi. Azərbaycan və Ermənistan sülh yolunda qarşıya çıxan əngəlləri əhəmiyyətli dərəcədə aşdılar və final mərhələsinə gəlib çatdılar. Mən Azərbaycan Prezidenti İlham Əliyevlə məzmunlu görüş keçirdim, sonra isə Ermənistan Baş naziri Nikol Paşinyanla görüşdüm. Hər iki görüşdə gördüm ki, Əliyev və Paşinyan eyni fikirdədirlər. Onlar eyni istiqamətə baxırlar. Zəngəzur dəhlizi ilə bağlı heç bir problem və ya fikir ayrılığı yoxdur"— deyə o bildirib.
Türkiyə lideri vurğulayıb ki, Azərbaycan Prezidenti İlham Əliyev bu məsələ ilə bağlı daha əmin görünür. Xüsusilə ABŞ-da keçirilmiş görüş onların növbəti addımlarında həlledici rol oynayıb.
"Sülhün təmin olunması ilə bölgəmizdə həm quru, həm də dəmiryolu xətləri aktivləşəcək ki, bu da çox vacibdir. Sərhəd keçid məntəqələri açılacaq və xüsusilə ticarət olmaqla bir çox sahələrə müsbət təsir göstərəcək. Bu həmçinin bizim üçün də müsbət nəticələr verəcək. Region ölkələri yeni əməkdaşlıq imkanlarından faydalanacaqlar. Gələcəkdə Rusiya və İran da anlayacaqlar ki, onların narahatlıqları əsassız olub" — deyə Ərdoğan əlavə edib.
15:19 02.09.2025
Oxunuş sayı: 4995
