Tramp administrasiyası tələbələr və jurnalistlər üçün vizaların müddətini məhdudlaşdırmağı planlaşdırır
Tramp administrasiyası tələbələr, mədəni mübadilə proqramları iştirakçıları və media nümayəndələri üçün vizaların müddətini məhdudlaşdırmağı nəzərdə tutan yeni qayda layihəsi təklif edib. Bu addım, prezident Donald Trampın vəzifəyə başladığı 2024-cü ilin yanvarından bəri həyata keçirdiyi genişmiqyaslı immiqrasiya sərtləşdirmə kampaniyasının bir hissəsidir.
Crossmedia.az xarici KİV-ə istinadən xəbər verir ki, yeni qaydalar beynəlxalq tələbələr, mübadilə işçiləri və xarici jurnalistlər üçün ABŞ-da qalmaq üçün əlavə müraciətlər etməyi zəruri edəcək. Hal-hazırda F (tələbə), J (mədəni mübadilə proqramı iştirakçıları) və I (media nümayəndələri) vizaları proqramın və ya iş müddətinin davamına uyğun olaraq verilir. Lakin yeni təklifə əsasən, bu vizalara sabit müddət müəyyən ediləcək.
ABŞ hökumətinin məlumatına görə, 2024-cü ildə təxminən 1,6 milyon beynəlxalq tələbə F vizası ilə ABŞ-da təhsil alırdı. 2024-cü maliyyə ilində ABŞ 355,000 mübadilə iştirakçısına və 13,000 media nümayəndəsinə viza verib.
Yeni qaydaya əsasən, tələbə və mübadilə vizalarının müddəti maksimum 4 il olacaq. Jurnalist vizaları isə ümumilikdə 240 günə qədər veriləcək. Çin vətəndaşları üçün bu müddət cəmi 90 gün olacaq. Təklifdə deyilir ki, bu vizaların sahibləri müddətin uzadılması üçün müraciət edə biləcəklər.
Çinin Xarici İşlər Nazirliyi, Çin jurnalistləri üçün təklif olunan yeni qaydalarla bağlı verdiyi açıqlamada, ABŞ-ın bəzi ölkələrə qarşı ayrı-seçkilik siyasətini tənqid edərək, bu cür təcrübələrə qarşı olduqlarını bildirib.
Tramp administrasiyası qayda dəyişikliklərinin məqsədinin ABŞ-da olan vizalı şəxslərin daha effektiv “nəzarət və müşahidəsi” olduğunu bildirib.
İctimaiyyət bu təkliflə bağlı 30 gün ərzində rəy bildirmək hüququna malik olacaq. Bu qayda ilk dəfə Trampın birinci prezidentlik dövrünün sonunda – 2020-ci ildə təklif olunmuşdu.
Qeyri-kommersiya təşkilatı olan NAFSA, dünya üzrə 4,300-dən çox təhsil müəssisəsini təmsil edir və 2020-ci ildə təklif olunan bu qaydaya qarşı çıxaraq onun ləğvini tələb etmişdi. Daha sonra Demokrat prezident Co Baydenin administrasiyası həmin qaydanı 2021-ci ildə geri çəkmişdi.
Tramp administrasiyası ümumiyyətlə, hüquqi immiqrasiyaya nəzarəti artırıb, universitet tələbələrinin ideoloji baxışlarına görə viza və yaşıl kartlarını ləğv edib və yüz minlərlə miqrantın hüquqi statusunu əlindən alıb.
Zayirova Səbiyyə
14:51 28.08.2025
Oxunuş sayı: 1276
