İran XİN : "Zəngəzur dəhlizi ilə bağlı “qırmızı xətlər” qorunub"
İranın xarici işlər naziri Abbas Əraqçı Zəngəzur dəhlizi ətrafında yaranmış vəziyyəti şərh edib. Onun sözlərinə görə, bu məsələdə İranın “qırmızı xətləri” tam şəkildə qorunub. Nazir obyektiv qiymətləndirmənin vacibliyini vurğulayaraq bölgədə sabitliyin təmin olunması üçün bütün amillərin nəzərə alınmasının önəmli olduğunu bildirib.
Crossmedia.az xəbər verir ki, bu barədə xarici KİV məlumat yayıb.
İsraillə mümkün hərbi qarşıdurma məsələsinə toxunan Əraqçı İranda müharibəni qaçılmaz hesab etmədiklərini deyib:
“Biz ehtiyatlı olmalı və müharibə atmosferi yaratmamalıyıq… Münaqişə ehtimalı istənilən ölkə üçün mövcuddur", – deyə o qeyd edib.
Nazir həmçinin “Snapback” mexanizminə – İranın nüvə sazişi çərçivəsində sanksiyaların bərpası proseduruna da münasibət bildirib. Belə ki, o İranın nüvə obyektlərinə edilən hücumlar və zədələr fonunda yoxlamaların formatına yenidən baxılmasının zəruriliyini vurğulayıb.
Bundan əlavə, Livan məsələsinə və “Hizbullah”ın roluna da toxunan Əraqçı İranın Livanın daxili işlərinə qarışmadığını, lakin “müqavimətin” mövcudluğunun regionun təhlükəsizliyinin təminində və gərginliyin qarşısının alınmasında mühüm rol oynadığını qeyd edib.
Fatimə Məmmədova
13:06 15.08.2025
Oxunuş sayı: 5854
