ABŞ- Rusiya müharibəsi başlayır?: "Risklər artacaq"
ABŞ Prezidenti Donald Tramp ölkəsinin Rusiya ilə ehtimal olunan nüvə münaqişəsinə tam hazır olduğunu bəyan edib. Belə ki, Tramp “Fox News”a verdiyi müsahibədə Rusiya Təhlükəsizlik Şurası sədrinin müavini Dmitri Medvedevin nüvə silahı ilə bağlı sərt açıqlamalarına cavab olaraq, iki atom sualtı qayığının Rusiya yaxınlığında yerləşdirilməsi barədə əmr verdiyini bildirib. Onun sözlərinə görə, bu addım Vaşinqtonun regionda güc nümayiş etdirmək və Kremlə xəbərdarlıq etmək məqsədi daşıyır.
Məlum olduğu kimi, ABŞ danışıqlara başlamaq üçün Rusiyaya avqustun səkkizinə qədər vaxt vermişdi. Trampın qoyduğu "son tarix"in bitməsinə dörd gün qalıb. Ancaq Moskva hələ heç bir konstruktiv mövqe ortaya qoymur. Heç danışqların ilkin əlaməti də hiss olunmur. Elə isə ABŞ doğrudanmı, Rusiyaya qarşı nüvə savaşına başlayacaq?
Bu barədə Crossmedia.az-a danışan hərbi ekspert Ədalət Verdiyev bildirib ki, Trampın hakimiyyətə gəlməsi ilə bir çoxları ABŞ-Rusiya münasibətlərində yumşalma gözləyirdi. Lakin son hadisələr əksini göstərdi: “Tramp rusiyalı həmkarı Vladimir Putinin davranışlarından, xüsusilə də müharibənin dayandırılması istiqamətində Kremlin göstərdiyi qeyri-kafi səylərdən açıq şəkildə narazıdır. Məhz buna görə də ABŞ-nin sualtı qayıqlarının Rusiya ərazilərinə yaxın akvatoriyada yerləşdirilməsi, Vaşinqtonun Moskvaya qarşı təzyiqləri artırmaq niyyətindən xəbər verir. Hazırda tərəflər arasında güc balansında ciddi dəyişiklik müşahidə olunmasa da, son proseslər, xüsusilə İranla İsrail arasında baş verən hərbi qarşıdurma ABŞ-nin hava hücum potensialında, həmçinin qanadlı və ballistik raketlər sahəsində ciddi üstünlüyə malik olduğunu göstərdi. Digər tərəfdən, Avropa İttifaqı Rusiyaya qarşı tətbiq edilən sanksiyalar paketinin sayını 18-ə çatdırmaqla Moskvanın hərbi və iqtisadi manevr imkanlarını məhdudlaşdırmağa çalışır".
Ekspertin fikrincə, ABŞ ilə Rusiya arasında münasibətlər gərgin mərhələyə daxil olsa da, hazırda tammiqyaslı eskalasiyadan danışmaq hələlik erkəndir: "Lakin proseslərin gedişatı göstərir ki, gələcəkdə bu risklərin daha da artması mümkündür".
Mehriban Yariyeva
14:38 04.08.2025
Oxunuş sayı: 964
