Üçüncü Qarabağ müharibəsi anonsu: "Qərbi Azərbaycana qayıdırıq"
Prezident Administrasiyasının xarici siyasət məsələləri şöbəsinin müdiri Hikmət Hacıyev Almaniyanın “Berliner Zeitung” qəzetinə verdiyi müsahibədə deyib ki, biz erməni cəmiyyətindəki revanşizmin yeni dalğasına qarşı çox diqqətli olmalıyıq: "Artıq regiondakı yeni status-kvonu şübhə altına alan yeni cəhdlər var:
"Biz erməni cəmiyyətindəki revanşizmin yeni dalğasına qarşı çox diqqətli olmalıyıq. Görürük ki, artıq regionumuzdakı yeni status-kvonu şübhə altına alan yeni cəhdlər var. Biz yeni reallıqları sarsıtmaq tendensiyalarını və erməni gənclərinin yeni qarşıdurmalar və müharibələr üçün necə indoktrinasiya edildiyini görürük. Bu tamamilə qəbuledilməzdir. Buna görə də erməni hökuməti indi öz cəmiyyətinə diqqət yetirməlidir. Mən inanıram ki, konstitusiya dəyişikliyi bütün bunlara son qoymaq üçün vacib addım olacaq".
İkinci Qarabağ müharibəsi bitdikdən sonra erməni revanşist qüvvələrinin pozucu fəaliyyətinə bir neçə dəfə şahid olmuşuq. Tarixi ədalətin bərpasını həzm edə bilməyən bəzi qrupların yeni revanşist əməliyyatlarının olacağı proqnozlaşdırılır. Bəs bu pozuculuq fəaliyyətinin həyata keçməsi nə qədər realdır? Yarana biləcək hər hansı təxribat münasibətlərə necə təsir edəcək?
Bu barədə Milli Məclisin deputatı, professor Hikmət Babaoğlu Crossmedia.az-a açıqlama verib: “Hörmətli Hikmət Hacıyevin regional vəziyyəti təsbit edərkən xüsusi qiymətləndirmə aparması və bu konteksdə regionumuzdakı yeni status-kvonu şübhə altına alan yeni cəhdlərin olduğunu ifadə etməsi reallığa əsaslanan fikirdir. Nəticə etibarilə biz bilirik ki, müharibədən dərhal sonra da bu tendensiyalar olub. Amma bəzən zəifləyib, bəzən isə yüksəlib. Hazırda, bir il sonra Ermənistanda keçiriləcək seçkiyə görə həm yeni status-kvonu qəbul etməyənlər, həm də revanşistlər daha da fəallaşıb. Önümüzdəki seçkiyə baş nazir Nikol Paşinyan və komandası bir cür, revanşistlər, daşnaklar, terroristlər, radikallar və xaricdən onları dəstəkləyən imperialistlər tamam başqa cür hazırlaşır. Düşünürəm ki, ilk növbədə revanşistlər ölkə daxilində revanşizmə kökləniblər. Yəni Paşinyan komandasını siyasi hakimiyyətdən uzaqlaşdırıb hakimiyyəti ələ keçirmək, daha sonra isə yeni formalaşacaq komanda ilə yeni müharibəyə hazırlaşaraq status-kvonu dəyişməyə cəhd göstərəcəklər”.
Deputat həmçinin bildirib ki, bu, ikimərhələli prosesdir: "Ona görə də hər iki mərhələ üçün ciddi hazırlıq həyata keçirilir.Bunun da real olduğunu düşünürəm. Çünki bilirik ki, Rusiyadan oliqarx siyasətçilər Ermənistana ixrac edilib. Bu artıq üçüncü cəhddir. Birinci cəhd iş adamı Ruben Vardanyanən "oyuna daxil edilməsi" idi. O, hazırda Azərbaycan təcridxanasında cəzasını çəkir. İkinci cəhd kilsənin daxildə qarşıdurma yaratması idi ki. Görünür, bu da uğursuz oldu. Sonuncu və üçüncü cəhd isə Rusiyaya bağlı siyasətçi Samvel Karapetyanla bağlıdır. Bunun nə ilə nəticələnəcəyini proqnozlaşdırmaq çox çətindir. Görünür, iki uğursuzluqdan sonra imperialistlər Karapetyanı həm hərbi, həm də siyasi baxımdan dəstəkləyəcəklər. Yəni Ermənistanın təxribat törətmək cəhdləri çox realdır. Amma unutmasınlar ki, Azərbaycan da bütün bunların fərqində olduğu üçün Ermənistanın törədəcəyi istənilən təxribata hazırdır. Əgər ikinci Qarabağ savaşı Azərbaycanın qəti qələbəsi ilə başa çatdısa, üçüncü Qarabağ savaşı çıxarsa, o da tarixi ədalətin tam bərpası ilə başa çatacaq. Yəni qərbi azərbaycanlıların öz torpaqlarına gedib tam təhlükəsiz məskunlaşması ilə nəticələnəcək”.
Ayhan
12:08 03.07.2025
Oxunuş sayı: 8080
