Kürdəmirdə ilk dəfə “Bostan Festivalı” keçirilib
Bu gün Kürdəmir rayonunda ilk dəfə olaraq “Bostan Festivalı” keçirilib.
Crossmedia.az xəbər verir ki, “Bostan Festivalı” Kürdəmir Rayon İcra Hakimiyyətinin və Kənd Təsərrüfatı Nazirliyinin Aqrar İnnovasiya Mərkəzinin birgə təşkilatçılığı ilə keçirilib.
Kürdəmir şəhərinin Heydər Əliyev prospektində (Kürdəmir rayon İcra Hakimiyyətinin inzibati binasının qarşısında) təşkil olunan festivalda Kürdəmirdə əsasən bostançılıq fəaliyyəti ilə məşğul olan fermerlər, digər məhsul istehsalçıları iştirak edib, stendlərdə maraqlı sərgilər, müsabiqələr, yerli mətbəx təqdim edilib.
Pəhləvan və kəndirbazın çıxışı maraqla izlənilib və konsert proqramı nümayiş olunub. Konsert proqramında rayonunun incəsənət ustaları, müğənni və xanəndə, Azərbaycan Dövlət Televiziyasının və Azərbaycan Muğam Mərkəzinin solisti Mirələm Mirələmov da iştirak edib.
Festivalda Kürdəmir Rayon İcra Hakimiyyətinin başçısı Elxan İbrahimov, Milli Məclisinin deputatları Jalə Əliyeva, Əminə Ağazadə, Kənd Təsərrüfatı Nazirliyinin Aqrar İnnovasiya Mərkəzinin direktoru Anar Cəfərov, Aqrar, Ekologiya və Su Təsərrüfatı İşçiləri Həmkarlar İttifaqı Respublika Birliyinin sədr müavini Fuad Məmmədov, Tərəvəzçilik Elmi-Tədqiqat İnstitutunun İdarə Heyətinin sədri Elmar Allahverdiyev çıxış edərək qeyd ediblər ki, Kürdəmir rayonunda təşkil olunmuş möhtəşəm “Bostan Festivalı”nın rayonda aqro-turizm potensialının artırılmasına, yerli kənd təsərrüfatı imkanlarının tanıdılmasına, fermerlər və sahibkarlar arasında işgüzar əlaqələrin genişləndirməsinə, eləcə də rayonun sosial-iqtisadi və mədəni inkişafına müsbət təsir göstərəcək, bostan bitkilərinin Kürdəmir rayonu üçün brendləşməsinə, rayonun turizm və mədəni potensialını önə çıxaracaqdır.
Festival “Aqrar sahədə dövlətin maliyyə mexanizmləri” panel müzakirə ilə davam edib. Panel müzakirədə çıxış edənlər Kürdəmir rayonunda ilk dəfə təşkil olunan bu festivalın bostançılıq fəaliyyəti ilə məşğul olan fermerlərin innovativ həllərə əsaslanan texnoloji yeniliklərə əlçatanlığının təmin olunması və təşviqi, bostançılıq sahəsində fəaliyyət göstərən şirkətlər arasında təcrübə mübadiləsi, qarşılıqlı faydalı işgüzar görüşlərin keçirilməsi, dövlət və özəl qurumlar, elmi-tədqiqat müəssisələri arasında əməkdaşlığın gücləndirilməsinə səbəb olacağını vurğulayıblar.
14:20 25.07.2025
Oxunuş sayı: 10900
