İşğal altındakı Ukrayna ərazilərində su qıtlığı artır: xəstəlik riski böyüyür
Rusiyanın yaratdığı su böhranı daha da pisləşir və işğal olunmuş Ukraynanın bir sıra bölgələrində qeyri-sağlam yaşayış şəraiti yaradır. Ukraynanın Mariupol şəhərinin meri Petro Andryuşçenko iyulun 22-də bildirib ki, işğal olunmuş Donetsk vilayətində içməli suyun əsas mənbəyi olan Krynka çayı üzərindəki Xanjenkivske su anbarı tamamilə quruyub. Donetsk Xalq Respublikası (DXR) rəhbərliyi iyulun 21-də bildirib ki, vilayətin su ehtiyacının üçdə birini təmin edən Don-Donbas kanalında da suyun səviyyəsi kritik həddə enib. Rusiyanın “Komsomolskaya Pravda” qəzeti isə həmin gün yazıb ki, Donetsk vilayətində su böhranı getdikcə dərinləşir və bölgə yalnız ehtiyac duyduğu suyun 30 faizini ala bilir. Berdovski su boru kəmərində baş verən və detalları açıqlanmayan bir “qəza” səbəbilə işğal olunmuş Berdyansk (Zaporojye vilayəti) şəhərində mərkəzləşdirilmiş su təchizatı dayandırılıb.
Crossmedia.az xəbər verir ki, bu barədə ABŞ-nin Müharibə Araşdırmaları İnstitutu məlumat yayıb.
Məlumata görə, Ukrayna Müqavimət Mərkəzi iyulun 21-də bildirib ki, Rusiya Donetsk vilayətini işğal etdikdən sonra mövcud su sistemini dağıdıb və onun yerinə yeni sistem qurmayıb. Nəticədə işğal olunmuş Donetsk vilayətinin bir çox bölgəsində sakinlər yalnız hər üç gündən bir, bir neçə saatlıq su əldə edə bilirlər. Su infrastrukturu ilə bağlı problemlər Zaporojye vilayətinin də bəzi işğal olunmuş hissələrinə təsir edir. Suyun əlçatan olmaması bölgə əhalisini qeyri-sağlam və ekstremal yollarla yaşamağa məcbur edir. Rusiyapərəst fəaliyyəti səbəbilə işğal olunmuş Krımda yaşayan keçmiş ukraynalı siyasətçi Oleq Tsaryov iyulun 21-də bildirib ki, Donetsk vilayətində insanlar tualetə getmək üçün plastik torbadan istifadə edir və onu sonra atırlar, çünki su çatışmazlığı səbəbindən unitazları çəkmək mümkün deyil. Bu cür sanitar şərait sağlamlıq böhranına yol aça bilər.
İşğal administrasiyaları böhranı “effektiv şəkildə idarə etdiklərini” iddia etməyə davam edir və yaranmış su çatışmazlığına görə Ukraynanı günahlandırırlar. DXR rəhbəri Denis Puşilin iyulun 19-da bildirib ki, onun rəhbərliyi Krynka çayının suyunu su anbarlarına yönəltməyə başlayıb və Donetsk şəhərində su təminatını asanlaşdırmaq üçün əlavə 166 su çəni quraşdıracaq. “Komsomolskaya Pravda” iyulun 21-də yazıb ki, işğal administrasiyası Donetsk şəhərinin Kirovski və Petrovski rayonlarına verilən suyun miqdarını artıracaq. Zaporojye vilayətinin işğal administrasiyasının rəhbəri Yevgeni Balitski iybildirib ki, Lunaçarski su quyularından çəkilən boru xətti gündəlik 5,000 kubmetr suyu Berdyanskın su təmizləmə stansiyasına çatdıracaq və Berdyanskda dörd əsas su kəmərində aparılan əsaslı təmir işləri su çatışmazlığını aradan qaldıracaq. Mariupolun işğal olunmuş hissəsində təyin edilmiş rəhbər Anton Koltsov iyulun 21-də bildirib ki, su problemi ilə məşğul olmaq üçün qərargah yaradıb. İşğal administrasiyaları bu böhranın məsuliyyətini Ukraynanın üzərinə atmağa çalışaraq, guya problemin aradan qaldırılması üçün konkret addımlar atdıqlarını iddia edirlər.
Nigar Rəhimova
01:34 25.07.2025
Oxunuş sayı: 8269
