Tailand və Kamboca sərhədində silahlı toqquşma: dörd vilayətdə əhali təxliyə edilir
Tailandın Kamboca ilə sərhəddə yerləşən dörd vilayətində yerli hakimiyyət orqanları əhalinin təxliyəsinə başlayıb. Bu qərar iki ölkə arasında sərhəd bölgəsində yenidən alovlanan silahlı toqquşmalar fonunda verilib. Hadisə ilə bağlı The Nation nəşri məlumat yayıb.
Crossmedia.az xarici KİV-ə istinadən bildirir ki, iyulun 24-də Tailand və Kamboca arasında yerləşən sərhəd xəttində hərbçilər arasında atışma baş verib. Hər iki tərəf bir-birini atəşi ilk açmaqda ittiham edir. Tailand hərbçilərinin sözlərinə görə, ilk atəşi kambocalı əsgərlər açıblar. Kamboca tərəfi isə əksinə, tay əsgərlərinin atəşə başladığını və bunun cavab olaraq özlərini müdafiə etdiklərini bildirib.
Toqquşma qədim məbədlərin yerləşdiyi mübahisəli sərhəd zonasında baş verib. Bu ərazi uzun illərdir iki ölkə arasında mübahisə predmetidir. Bu dəfəki insident təkcə atışma ilə məhdudlaşmayıb – Tailand rəsmilərinin məlumatına görə, Kamboca tərəfindən atılan qumbara partlayışı nəticəsində azı iki mülki şəxs həlak olub, daha iki nəfər yaralanıb. Həmçinin iki tay hərbçisi də yaralanıb. Bu barədə İsveçrənin SRF kanalı da məlumat yayıb.
Qeyd edək ki, Tailand-Kamboca sərhədindəki bu münaqişə onilliklərdir davam edir. Son həftələr isə gərginlik yeni mərhələyə keçərək daha da kəskinləşib. Hazırda vəziyyətin nəzarətdən çıxmasının qarşısını almaq üçün diplomatik kanallar vasitəsilə təmaslar qurulmağa çalışılır.
Mehriban Yariyeva
15:13 24.07.2025
Oxunuş sayı: 915
