Terrorçular silahı təhvil verməyəcəyini açıqladı: "Suriyanın bölünməsi..."
PKK-nın Suriyadakı qolu olan YPG/SDG ölkədə davam edən gərginliyi bəhanə gətirərək mövcud şəraitdə silahlarını təhvil verməycəklərini açıqlayıb. Bu barədə təşkilatın adı açıqlanmayan üzvü onlara bağlı internet saytlarına danışıb.
“Suriyada davam edən gərginlik, şiddətin yüksək səviyyəsi və İŞİD təhlükəsi fonunda qüvvələrimizin silahlarını təhvil verməsi mümkün deyil”, - o bildirilib.
Qeyd edilib ki, əgər razılıq əldə olunsa, onlar Suriya ordusuna qoşulmağı istisna etməyəcəklər.
YPG/SDG lideri Ferhat Abdi Şahin isə Almaniya mətbuatına verdiyi açıqlamada Suriya prezidenti ilə əldə olunan razılaşmanın həyata keçəcəyi təqdirdə silahı yerə qoymaqlarına ehtiyac qalmayacağını vurğulayıb:
"Çünki biz avtomatik olaraq Suriya ordusunun bir hissəsi olacağıq və Suriyanın şimal-şərqini Suriya ordusu qoruyacaq. Ona görə də indi və ya gələcəkdə silahlarımızı yerə qoymağa ehtiyac yoxdur".
YPG-nin qərarını Crossmedia.az-a a şərh edən Orta Doğu Araşdırmalar Mərkəzinin sədri, politoloq Sədrəddin Soltan deyib ki, PKK-nın Suriyadakı YPG, PYD və onların təsis etdiyi Suriya demokratik qüvvələri bir neçə ay öncə Suriya keçid dövrü prezidenti Əhməd əl Şaaranın silahları təhvil verməklə bağlı çağırışına müsbət cavab vermişdilər: "Onların liderləri bildirib ki, bu silahlar əvvəl ölkədəki qarışıq vəziyyət üçün lazım idi. Lakin indi sabitlik bərpa olunub. Ona görə də bundan sonra silahların təhvil verilməsi daha məqbuldur. Amma ötən müddət ərzində PYD, YPG silahları təhvil vermədi və əvvəlki qaydada silahlı qruplaşma fəaliyyətini yerinə yetirməkdədir. Nə baş verir? Hesab edirəm ki, Suriya prezidenti Əhməd- Əş Şaara və beynəlxalq güclər, o cümlədən ABŞ Suriyanın ərazi bütövlüyünü dəstəkləyəndən sonra məlum olur ki, Suriyanın bölünməsi yaxud hər hansı federallaşma baş verməyəcək. Kürdlərin adından çıxan müxalif qruplaşma isə indiki vəziyyətdə Suriyada İraqdakı muxtariyyətin olmasını istəyirdilər. Yəni Suriyanın şimalının kürtlərin muxtariyyətinə verilməsini tələb edirdilər. Bu baş vermir”.
Politoloq həmçinin qeyd edib ki, druzların apardığı silahlı müqavimət və bunun İsrail tərəfindən dəstəklənməsi həmin silahlə qruplaşmalara bir dəstək olur. Bunlarda özlərinə tərəfdaş tapmış olur: "David dəhlizi ilə Suriyanın şimalının birləşməsi, şimal-cənub dəhlizinin yaranması Suriyanın parçalanması ilə nəticələnə bilər. Odur ki, silahları təhvil verməmək və əvvəlki kimi Suriyanın ərazi bütövlüyünü təhdid etmək region üçün təhlükəlidir. Bu həm də Türkiyə üçün çox təhlükəlidir. Ötən gün Türkiyənin xarici işlər naziri Hakan Fidan bildirdi ki, Suriyada xaos yaradılarsa və Türkiyənin təhlükəsizliyi təhdid olunarsa o zaman Suriya ərazisinə müdaxilə edəcəklər. İyulun 23-də rəsmi Dəməşq ölkənin daxili təhlükəsizliyini təmin etmək üçün türkiyədən yardım istəyib. Bu da o deməkdir ki, silahlar təhvil verilmədiyi müddətcə problemlər də artacaq”.
Ayhan
13:46 24.07.2025
Oxunuş sayı: 13588
