Azərbaycan nüvə dövləti ilə əlaqələrini gücləndirir: "Strateji əhəmiyyət daşıyır"
Türkiyədə Azərbaycan müdafiə naziri general-polkovnik Zakir Həsənov Pakistanın Birləşmiş Qərargah Rəisləri Komitəsinin sədri general Sahir Şamşad Mirza ilə görüşüb. Bu barədə Müdafiə Nazirliyi məlumat yayıb.
Qeyd edilib ki, İstanbul şəhərində keçirilən görüşdə iki ölkə arasında əlaqələrin qarşılıqlı inama, əməkdaşlığa, eləcə də mədəni əsaslara söykəndiyi vurğulanıb.
Tərəflər Azərbaycan-Pakistan hərbi əməkdaşlığının cari vəziyyətini müzakirə edib, həmçinin bu münasibətlərin daha da möhkəmləndirilməsi istiqamətində həyata keçiriləcək tədbirlər barəsində ətraflı fikir mübadiləsi aparıblar.
Görüşdə, həmçinin hərbi əlaqələrimizin yeni inkişaf perspektivləri müzakirə olunub.
Sözügedən görüşün əhəmiyyəti barədə Crossmedia.az-a danışan hərbi ekspert Ədalət Verdiyev söyləyib ki, Azərbaycan etibarlı tərəfdaş olaraq, digər ölkələrlə xüsusilə də Türk Dövlətləri Təşkilatı üzvü olan və Azərbaycanla yaxından əməkdaşlığa can atan Pakistanla bütün sahələrdə, o cümlədən hərbi sahədə yaxından əməkdaşlıq edir: "Bu əməkdaşlığın gələcəkdə genişləndirilməsi üçün müvafiq görüşlərin keçirilməsi də ordumuzun təchizatının, döyüş hazırlığının yaxşılaşdırılmasına yönəlib. Təsadüfi deyil ki, Azərbaycan Aviasiya parkının yenilənməsi üçün Pakistan istehsalı “JF-17 Thunder” qırıcılarını seçib. Bu isə Azərbaycan ilə Pakistan arasındakı münasibətlərin strateji əhəmiyyət daşıdığını və hər iki ölkənin qarşılıqlı şəkildə bir-birinə yüksək səviyyədə etibar etdiyini göstərir. Birgə təlimlərin keçirilməsi isə təbii ki, hər iki qardaş ölkənin orduları arasında qarşılıqlı əlaqələrin yüksəldilməsinə, təcrübə mübadiləsinin aparılmasına və yeni silahlı mübarizə metodlarının birgə tətbiqinə hesablanıb”.
Ayhan
12:50 24.07.2025
Oxunuş sayı: 16338
