Türkiyə - İsrail müharibəsi başlayır: "Tərəflərdən biri kompromisə getməsə..."
Suriya daxili təhlükəsizliyi təmin etmək üçün Türkiyədən rəsmi olaraq hərbi dəstək istəyib.B barədə ölkənin Milli Müdafiə Nazirliyi məlumat yayıb.
"Suriya administrasiyası Türkiyəyə müdafiə qabiliyyətini gücləndirmək və bütün terror təşkilatları, xüsusilə İŞİD ilə mübarizə aparmaq məqsədilə rəsmi dəstək sorğusu ilə müraciət edib" - nazirlikdən bildiriblər.
Bəyanata əsasən, Türkiyənin prioritet məqsədi Suriyanın siyasi birliyini və ərazi bütövlüyünü dəstəkləmək, həmçinin regionda davamlı sülhü təmin etməkdir.
Yaxın Şərqdə vəziyyət getdikcə daha da gərginləşir. İsrail-Fələstin münaqişəsinin alovlanmasından sonra, indi də İsrail və Suriya arasında münasibətlər toqquşma həddinə çatıb. Regionda sabitliyin əsas təminatçılarından biri kimi çıxış edən Türkiyənin Dəməşqin müraciətinə hansı mövqedən yanaşacağı maraq doğurur: Ankara Suriyaya hərbi yardım göstərəcək, yoxsa qarşıdurmanın diplomatik yollarla həllinə çalışacaq?
Bu barədə politoloq, professor Əlimusa İbrahimov bu barədə Crossmedia.az-a danışıb: “Əlbəttə, Suriyanın Türkiyədən yardım istəməsi gözlənilirdi. Rəsmi Ankara, nəhayət ki, bu məsələyə razılığını bildirib. Suriyanın hərbi sənayesini inkişaf etdirmək və hərbi cəhətdən Suriyanı gücləndirmək istiqamətində addımlar atmaq qərarına gəlib. Nə üçün belə düşünürəm? Ona görə ki, Türkiyə Suriyanın müraciətini cavabsız saxlaya bilməz. Türkiyə Suriyanın hərbi sənayesini artırmaq istiqamətində addımlar atmalıdır. Bu qərara birdən-birə yox uzun danışıqlardan sonra gəlindi. Eyni zamanda Türkiyə Suriya ilə hərbi sahədə əməkdaşlığın nəticələri barədə yol xəritəsi cızıb. Vəziyyət İsraillə müharibəyə qədər gətirib çıxara bilər. Bu isə o deməkdir ki, Türkiyə İsraillə müharibəyə də hazırdır. Deməli, Suriyanın bu müraciəti də birdən-birə olmadı, əvvəldən planlaşdırılmışdı. Düşünürəm ki, bu vəziyyətin yaranmasında əsas səbəbkar İsraildir. İsrailin Suriyaya olan münasibəti bu cür olmasa idi, münaqişə həddinə gəlməsə idi belə olmazdı. Məncə, tərəflərdən biri kompromisə getməyə məcburdur. Əks halda regionda yeni münaqişə ocağının yaranması qaçılmazdır”.
Ayhan
12:36 24.07.2025
Oxunuş sayı: 12714
