Türkiyə Suriyaya ordu yeridir? - "Kəskin və əzmli mövqe..."
Türkiyənin xarici işlər naziri Hakan Fidan bildirib ki,
Suriyada sabitliyi pozacaq addımlar milli təhlükəsizliyə təhdid kimi qiymətləndiriləcək
və bu halda Ankara müdaxilə edəcək. O, Suriyadakı silahlı qrupları xaosdan
faydalanmağa çalışmamağa çağırıb və diplomatiyanın hələ də imkan verdiyini
vurğulayıb.
Məlum olduğu kimi, Suriyada vəziyyət kifayət qədər gərgindir.
Rəsmi Dəməşqdə qarşı olan təhdid Ankaranın maraqlarına uyğun deyil. Bu isə o
deməkdir ki, perspektivdə Türkiyənin proseslərə müdaxilə etmək ehtimalı heç də
az deyil.
Bu barədə Crossmedia.az-a danışan politoloq Mütəllim Rəhimli deyib ki, Türkiyənin Suriya məsələsində kəskin və əzmli mövqeyini qoruyub saxlamalıdır: “Suriyada Bəşər Əsəd rejiminin devrilməsindən sonra Türkiyə bu ölkədə vətəndaş müharibəsinə son qoyulması, dağıdılmış infrastrukturun bərpası, iqtisadiyyatın qurulması üçün xeyli vaxt və enerji sərf edib. İndi ölkə daxilində ayrı-ayrı qrupların qayda-qanunlara tabe olmayaraq hərəkət etmək istəyi pozuculuqdan və Suriyanın milli maraqlarına zərbə vurmaqdan başqa bir şey deyil. Görünür, onlar bölgəni yenidən qarışdırmaq, Suriya daxilində sabitliyin bərqərar olmasını istəməyən qüvvələr tərəfindən yönəldilir. Bunun isə qarşısı sərt şəkildə alınmalıdır. Əks halda bu ölkə yenidən vətəndaş müharibəsi meydanına, terrorçuların yuvasına çevrilə bilər. Bu isə Suriyanın bəzi ərazilərini işğal etməyə çalışan qüvvələr üçün əlverişli mühit formalaşdırmış olar. Ona görə də Türkiyə Suriya məsələsində kəskin və əzmli mövqeyini qoruyub saxlamalıdır. Bunun üçün ilk növbədə bu ölkədə hərbi bazalar yerləşdirməli və genişləndirməlidir. Suriyanın yeni hökuməti kifayət qədər təcrübəsiz olduğundan ona yardım etməkdən çəkinməməlidir. Lazim gələrsə pozucu qüvvələrin susdurulması üçün hərbi gücündən də istifadə etməlidir”.
M.Rəhimli açıqlamasında söyləyib ki, Türkiyə Suriya daxilində gedən çirkin oyunlara biganə qala bilməz: “Türkiyənin milli təhlükəsizliyi qonşu ölkələrdən ona qarşı təhdidləri qəbuledilməz sayır. Məhz buna görə də Türkiyə ordusu İraqda, Suriyada terrorizmin kökünün kəsilməsi üçün əməliyyatlar aparır. Çünki terrorçu qruplaşmalar davamlı olaraq sərhədləri aşaraq Türkiyə daxilində terror törədirlər. Ona görə də Türkiyə hazırda Suriya daxilində kənar güclərin diqtəsi və ssenarisi ilə oynanılan çirkin oyunlara biganə qala bilməz. Çünki bütün bunlar onun üçün ciddi təhdid yaradır”.
Nicat Rüstəmzadə
17:45 23.07.2025
Oxunuş sayı: 8047
