Səfir: Ukrayna və Azərbaycan İrpendə dörd sosial obyektin tikintisi üçün sənədlər hazırlayır
Azərbaycan və Ukrayna İrpen şəhərində dörd sosial obyektin tikintisi üçün sənədlər hazırlayır.
Crossmedia.az xəbər verir ki, bu barədə Ukraynanın Azərbaycandakı səfiri Yuri Qusev bildirib.
O, bu obyektlərdən ikisinin idman və incəsənət məktəbləri olduğunu deyib.
Diplomat vurğulayıb ki, ukraynalı uşaqların Azərbaycanda reabilitasiyası və istirahəti proqramı da genişlənir.
"2022-ci ildən bəri 300-dən çox uşaq Azərbaycanda reabilitasiyadan keçib və yaxın zamanda hər biri 30 uşaqdan ibarət daha iki qrupun gəlməsini gözləyirik", - səfir bildirib və qeyd edib ki, belə əməkdaşlıq iki xalq arasında dostluğu möhkəmləndirir.
Y.Qusev iki ölkə arasında iqtisadi əməkdaşlığın dərinləşdiyini qeyd edib və Azərbaycan şirkətlərinin Ukraynaya investisiya qoymaqda maraqlı olduğuna diqqət çəkib.
"Keçən il azərbaycanlı investorlar özəlləşdirmə hərracına çıxarılmış Birləşmiş Dağ-Metallurgiya Şirkətini alıblar. Ölkələrimiz arasında ticarət dövriyyəsi, Azərbaycan şirkətləri tərəfindən Ukrayna iqtisadiyyatına investisiya qoyuluşu artır", - o qeyd edib.
Səfirin sözlərinə görə, Ukraynada müharibədən əvvəl qarşılıqlı ticarətin həcmi 1 milyard dolları ötsə də, 2024-cü ilin yekunları üzrə ticarət əməliyyatlarının həcmi cəmi 500 milyon dollar təşkil edib.
Səfir Ukraynanın Orta Dəhlizin inkişafında maraqlı olduğunu vurğulayıb, çünki bu, ölkəyə Ukrayna mallarının Azərbaycanda ticarətini inkişaf etdirməyə imkan verir.
"Orta Dəhlizin inkişafı Kiyev və Bakını birləşdirən çox aktual məsələdir", - diplomat yekunlaşdırıb.
18:29 22.07.2025
Oxunuş sayı: 736
